Rastet e dyshuara të vrasjeve rituale dhe tregtisë me pjesë trupore po vazhdojnë të tronditin Sierra Leonen, duke lënë pas viktima dhe familje të dërrmuara ndërsa autoritetet rrallë arrijnë të zbulojnë fajtorët.
Një nga rastet më të rënda është ai i 11-vjeçarit Papayo, i vrarë katër vite më parë në qytetin Makeni. Nëna e tij, Sallay Kalokoh, thotë se dhimbja nuk është shuar, ndërsa drejtësia ende mungon.
“Më vranë fëmijën dhe sot ka vetëm heshtje,” tha ajo për BBC Africa Eye. Trupi i djalit u gjet në fund të një pusi, i copëtuar dhe pa disa organe jetike. Ai kishte dalë të shiste peshk në treg dhe nuk u kthye më kurrë.
Familja e kërkoi për dy javë, deri kur e gjetën të masakruar.
Dyshime për vrasje rituale – por policia nuk heton
Në Sierra Leone, shpesh raportohet për vrasje të lidhura me “džudžu”, një formë e magjisë së zezë ku pjesët e trupit të njeriut përdoren për rituale nga praktikanë ilegalë. Këta u premtojnë klientëve pasuri dhe pushtet, duke i mashtruar se organet njerëzore mund të forcojnë amuletët magjikë.
Autoritetet megjithatë rrallë mund t’i hetojnë këto raste. Në një vend me afro 9 milionë banorë, ekziston vetëm një patolog. Hetimet ndeshen edhe me frikë dhe besime të thella në magji – madje edhe në radhët e policisë.
Shumica e rasteve mbeten të pazgjidhura.
Hetimi sekret i BBC: Praktikantët e magjisë ofrojnë pjesë trupore
Ekipi i BBC Africa Eye arriti të gjurmojë dy persona që pretendonin se kryenin rituale džudžu dhe që u ofruan të shisnin pjesë trupore. Njëri prej anëtarëve të ekipit, i maskuar dhe duke u prezantuar si politikan që kërkonte pushtet, u takua me një burrë të quajtur Kanu në një zonë të pyllëzuar pranë kufirit me Guinenë.
Veshur me maskë të kuqe ceremoniale, Kanu mburrej për lidhje me politikanë në Guinea, Senegal dhe Nigeri.
Gjatë takimit të dytë, ai tregoi atë që tha se ishte një kafka njerëzore.
“Kjo është e dikujt. Është kafka e një gruaje. Ose sot ose nesër vijnë ta marrin,” tha ai.
Ai tregoi edhe një gropë pas tempullit ku sipas tij “varen pjesët e trupit” dhe “derdhet gjaku”.
Kanu pretendoi se një trup i një gruaje për ritual kushtonte 70 milionë leona (rreth 3.000 dollarë).
Ekipi i BBC ia dorëzoi provat policisë, por nuk u kthye më për të mos rrezikuar këdo.
Tradita e mjekësisë popullore dhe keqpërdorimi kriminal
Në Sierra Leone ka rreth 45.000 mjekë tradicionalë, krahas 1.000 mjekëve të regjistruar. Shumë njerëz mbështeten tek këta shërues për trajtime, përfshirë probleme të shëndetit mendor, në ambiente që shpesh përfshijnë rit dhe elemente mistike.
Por liderët e shoqatave të shëruesve tradicionalë thonë se figurat kriminale si Kanu ua prishin reputacionin.
“Ne jemi shërues, jo vrasës,” tha Sheku Tarawallie, kreu i Këshillit të Shëruesve Tradicionalë. Ai beson se ritualet e dhunshme kryhen kryesisht nga njerëz që eten për pushtet dhe para.
“Pjesët e trupit i furnizojnë çdo natë” – furnizuesi i dytë
Ekipi i BBC gjeti edhe një furnizues tjetër të dyshuar në Waterloon e Freetownit, zonë e njohur për krim dhe abuzim me drogë. Burri, që u prezantua si Idara, tha se kishte rreth 250 bashkëpunëtorë.
“Nuk ka pjesë trupi me të cilën nuk punojmë,” tha ai.
Ai shtoi se disa nga njerëzit e tij “janë të zotët për të kapur njerëz”. Në një audio-mesazh të treguar gjatë investigimit, një prej bashkëpunëtorëve pretendonte se ekipi ishte gati të dilte “çdo natë” për të gjetur viktimë.