Në Komunën e Çairit u mbajt sot një ngjarje kulturore me rëndësi të veçantë, promovimi i gjashtë titujve të rinj të Shtëpisë Botuese “SHKUPI”, realizuar në bashkëpunim me Qendrën Kulturore Shqiptare “Migjeni” nga Suedia, në kuadër të manifestimit “Ditët e Letërsisë Suedeze”.
Ky aktivitet, i cili tashmë është shndërruar në traditë, mblodhi bashkë shkrimtarë, studiues, mësues dhe dashamirës të librit, duke krijuar një atmosferë të pasur me ide, krijimtari dhe dialog kulturor. Ngjarja u përshkrua si një hapësirë e vlefshme ku kultura jonë ndërthuret me përvojat e letërsisë moderne suedeze.
Kryetari i Komunës së Çairit, Izet Mexhiti, njëherësh edhe njëri nga liderët e koalicionit qeverisës VLEN, përgëzoi Shtëpinë Botuese “SHKUPI” për 31 vjet punë të pandërprerë dhe kontribut të çmuar në jetën intelektuale dhe kulturore të shoqërisë.
Mexhiti gjithashtu ka shprehur mirënjohje edhe për të gjithë pjesëmarrësit që e pasuruan këtë promovim me praninë dhe angazhimin e tyre, duke theksuar se Çairi mbetet një qendër e rëndësishme kulturore ku libri dhe dijet nderohen çdo ditë.