Rreth 48 persona u shpëtuan të gjallë pasi një anije thuhet se u largua nga Libia me rreth 60 pasagjerë. Rojet bregdetare italiane kanë nxjerrë 10 trupa pasi një varkë me emigrantë u përmbys në ujërat pranë Maltës, thuhet në një deklaratë të rojes bregdetare të dielën, shkruan The Guardian. Anija, e cila ishte nisur nga Libia duke transportuar rreth 60 persona, u përmbys rreth 45 milje detare në lindje-juglindje të Maltës, tha roja bregdetare italiane. “Sipas informacioneve të fundit, një varkë peshkimi në zonë shpëtoi rreth 48 persona të gjallë, nga rreth 60 që raportohet se janë nisur”, shtoi roja bregdetare. Roja bregdetare italiane dërgoi menjëherë një anije patrullimi në zonë, e cila deri më tani ka gjetur 10 trupa. Operacionet e kërkimit në zonë po vazhdojnë, të koordinuara nga autoritetet malteze. Roja bregdetare tha se Malta kishte kërkuar ndihmë në operacionin e kërkim-shpëtimit që po vazhdon, “pas përmbysjes së një anijeje të raportuar me emigrantë në bord dhe njerëz në ujë”. Të paktën 827 persona kanë vdekur deri më tani këtë vit duke u përpjekur të kalojnë Mesdheun Qendror, sipas Organizatës Ndërkombëtare për Migracionin (IOM) të OKB-së. Rruga qendrore mesdhetare është kalimi detar nga Afrika e Veriut në Itali dhe Maltë. Më shumë se 1,330 njerëz vdiqën në këtë rrugë vitin e kaluar, tha IOM. Bashkimi Evropian ka një marrëveshje me qeverinë libiane për të zvogëluar numrin e migrantëve që kalojnë nëpër vend. Që nga viti 2015, Bashkimi Evropian i ka dhënë Libisë 700 milionë euro (605 milionë paund), shumica e të cilave janë shpenzuar për forcimin e menaxhimit të kufijve. Politikat e migracionit të Italisë në Mesdheun qendror janë mbështetur prej kohësh në bashkëpunimin me Libinë për të frenuar largimet, duke përfshirë mbështetjen, trajnimin dhe pajisjet për rojen bregdetare libiane për të kapur anijet e emigrantëve.