Qeveria italiane, e udhëhequr nga kryeministrja Giorgia Meloni, ka miratuar masa të reja që synojnë parandalimin e dhunës, plaçkitjeve dhe dëmtimit të pronës gjatë protestave, pas trazirave që përfshinë Milanon.
Sipas informacioneve të publikuara, masat e reja parashikojnë dënime me burg deri në pesë vjet dhe gjoba deri në 20 mijë euro për forma të caktuara të dhunës në grup.
Gjithashtu, parashihet mundësia që prindërit të mbajnë përgjegjësi financiare për dëmet materiale të shkaktuara nga fëmijët e tyre të mitur.
Në kuadër të masave të shtuara të sigurisë, është paralajmëruar dislokimi i 500 ushtarëve shtesë në Milano, me qëllim forcimin e pranisë së forcave të sigurisë dhe parandalimin e incidenteve të reja.
Sipas shifrave të cilat i atribuohen Melonit, gjatë trazirave janë arrestuar 330 persona, janë lënduar afro 200 pjesëtarë të policisë, ndërsa i dyshuari më i ri i identifikuar ishte vetëm 11 vjeç.
Kryeministrja italiane përcjell mesazhin se e drejta për protesta paqësore duhet të mbrohet, por dhuna, shkatërrimi i pronës private dhe rrezikimi i sigurisë nuk duhet të mbeten pa pasoja.
Masat e reja kanë hapur gjithashtu debatin për balancën mes sigurisë publike, së drejtës për të protestuar dhe ashpërsisë së sanksioneve ndaj pjesëmarrësve në incidente të dhunshme.
Burimi:TV21
