Shkup, 23 prill – Zëvendëskryeministri për Çështje Ekonomike, Fatmir Bytyqi, konsideron se rritja e pagave në arsim, qoftë edhe për 10 për qind, siç propozon Qeveria, do të ndikojë në rritjen e inflacionit, por thotë se ky është rrezik i llogaritur.
“Interesi më i lartë në këtë moment është që fëmijët ta kenë të drejtën e arsimit të garantuar me Kushtetutë. Pa dallim të të gjitha aktorëve. Ne kemi bërë një hap përpara, të themi, edhe pse kemi pasur plane të caktuara, me vetëdije kemi hyrë në këtë spirale të rritjes së pagave, por duhet të ndodhë atëherë kur të vlerësohet se është efekti më negativ”, tha Bytyqi në emisionin e mbrëmshëm”. 360 gradë” në TV Alsat.
Bytyqi thotë se duhet të flitet edhe për produktivitetin, duke bërë një paralelizëm midis sektori privat dhe atij publik.
“Në sektorin privat kërkojmë produktivitet dhe efikasitet, e njëjta gjë duhet të kërkohet edhe në sektorin publik. Nëse këtu kërkojmë racionalizim dhe optimizim, këtë duhet ta zbatojmë edhe në sektorin publik”, theksoi Bytyqi.
I pyetur për qëndrimin e SASHK-ut se cilësia e nxënësve që vijnë nga sistemi ynë arsimor varet nga kushtet e këqija të punës, mungesa e pajisjeve adekuate… Bytyqi u përgjigj se përgjegjësia është e të gjithëve të përfshirë në sistem.
“Ndryshimi vjen nga ne. Nëse unë sot prej tetë orëve punoj tetë minuta, fajtor duhet të jetë kolegu im?! Unë jam fajtor. Nëse duhet të kaloj sot një komision në të cilin ka 90 pika dhe komisionin nuk e konvokoj katër javë, askush nuk ka faj, fajin e kam unë. Filloj nga ne. Kështu që, fajin dhe përgjegjësinë duhet ta shohim personalisht tek ne. Të gjithë jemi në ekosistem dhe çdo individ në ekosistem është fajtor dhe përgjegjës për situatën”, tha zëvendëskryeministri.
Theksoi se edhe vetë sindikatave u ka thënë se meritojnë paga më të larta dhe dinjitoze, por me parime të vlefshme dhe metodologji të qëndrueshme.
