Një dëshmi tronditëse vjen nga një prej pasagjereve të trenit Iryo, i përfshirë në aksidentin e rëndë hekurudhor në Spanjë. Eduarda ka rrëfyer momentet e tmerrit pas përplasjes së fortë, e cila shkaktoi të plagosur dhe detyroi evakuimin e pasagjerëve.
Në një intervistë për radion Cadena SER, ajo tregoi se goditja ishte aq e fortë, sa e hodhi përpara. Në vagonin ku ndodhej, disa pasagjerë mbetën të plagosur.
Fillimisht, Eduarda mendoi se treni kishte kryer një frenim të menjëhershëm emergjent. Vetëm pasi pa të plagosurit dhe u njoftua se duhej të zbriste nga treni, kuptoi përmasat e asaj që kishte ndodhur.
Pasi u largua nga vendi i aksidentit duke zbritur përgjatë një shpati, ajo u përball me një skenë shkatërrimi. Sipas dëshmisë së saj, një pjesë e trenit varej mbi shpat, ndërsa në njërin prej vagonëve kishte shpërthyer zjarr.
“Pashë njerëz të vdekur kudo”, rrëfeu pasagjerja, duke përshkruar pamjet që pa pas përplasjes.
Ajo bëri të ditur se shërbimet e emergjencës mbërritën në vendngjarje rreth 20 minuta pas aksidentit. Në operacionin e shpëtimit u angazhuan policia, ambulancat dhe një helikopter për t’u ardhur në ndihmë të plagosurve dhe për të menaxhuar situatën.
Aksidenti shkaktoi viktima dhe ndërpreu qarkullimin hekurudhor
Përplasja e trenave në Spanjë ka shkaktuar viktima dhe dhjetëra të plagosur, ndërsa autoritetet kanë ndërmarrë operacionet e nevojshme për evakuimin e pasagjerëve dhe trajtimin e të lënduarve.
Sipas raportimeve të mediave, njëri prej trenave ishte i ndaluar në momentin e përplasjes, ndërsa disa vagonë dolën nga shinat dhe ranë përgjatë një argjinature. Aksidenti ndodhi në një linjë që lidh Madridin me rajonin e Andaluzisë, në jug të Spanjës.
Treni Iryo transportonte 147 persona, ndërsa treni AVE kishte 397 pasagjerë në bord, sipas të dhënave të raportuara nga Sky News. Pas ngjarjes, kompania hekurudhore spanjolle ADIF njoftoi pezullimin e shërbimeve në linjën e prekur.
Kryeministri spanjoll, Pedro Sánchez, shprehu tronditjen për aksidentin dhe solidaritetin me viktimat dhe familjarët e tyre.
Shkaqet e përplasjes mbeten për t’u përcaktuar nga hetimet e autoriteteve.
Burimi:botasot.info
