Obduksioni i trupit të Hubert Aiwangerit, zëvendëskryeministrit të Bavarisë dhe kryetarit të partisë Freie Wähler (Votuesit e Lirë), nuk ka nxjerrë asnjë shenjë për krim apo për përfshirje të personave të tjerë në vdekjen e tij. Këtë e ka bërë të ditur të enjten Prokuroria e Berlinit, pas ekzaminimit mjekoligjor që, sipas një zëdhënësi, u krye në orët e paradites.
Sipas prokurorisë, rezultati është paraprak. Në kuadër të procedurës hetimore për rrethanat e vdekjes do të kryhen edhe ekzaminime të tjera mjekoligjore.
U gjet i pajetë në dhomën e hotelit
Aiwanger, 55 vjeç, u gjet i pajetë të mërkurën në mbrëmje në një dhomë hoteli në lagjen Mitte të Berlinit. Ai kishte ardhur në kryeqytetin gjerman për të përuruar zyrën e re të partisë së tij në Berlin, por nuk arriti të mbante fjalimin e paraparë në ceremoni për shkak të problemeve shëndetësore.
Pas gjetjes së trupit, prokuroria nisi një procedurë hetimore për vdekjen, ndërsa rastin e mori në shqyrtim edhe njësia për vrasje e policisë së Berlinit, siç është praktikë në raste të tilla. Nuk është bërë publike se kush e gjeti politikanin.
Tronditje përtej Bavarisë
Vdekja e papritur e Aiwangerit, i njohur si një nga politikanët më të zëshëm dhe më polemikë të Gjermanisë, ka shkaktuar tronditje përtej kufijve partiakë dhe jashtë Bavarisë. Kancelari gjerman Friedrich Merz (CDU) deklaroi se është thellësisht i prekur nga lajmi.
Aiwanger ishte që nga viti 2018 ministër i Ekonomisë së Bavarisë dhe zëvendëskryeministër i landit. Partia e tij qeveris në Bavari në koalicion me CSU-në e kryeministrit Markus Söder.
Në vitin 2023 ai ishte në qendër të një afere për një fletushkë antisemite nga vitet e shkollës, por Söder vendosi atëherë ta mbante në detyrë, duke e cilësuar shkarkimin si masë joproporcionale.
Burimi:botasot.info
