Dibër, 9 shkurt – Ministri i Shëndetësisë, Bekim Sali sot e ka vizituar Spitalin e përgjithshëm me aktivitet të zgjeruar në Dibër i cili me shërbime shëndetësore mbulon edhe komunën e Qendër Zhupës.
“Sot jemi për vizitë në spitalin në Dibër për të vënë në përdorim aparatin e mamografisë. Ne komunikojmë rregullisht me institucionet shëndetësore të cilët na informojnë se çfarë u mungon, për një kujdes më të mirë shëndetësor. Në një bisedë me drejtoren e këtij institucioni u informova se prioritet është pajisja me një aparaturë të tillë, për diagnostikim në kohë të kancerit të gjirit i cili do të jetë edhe në shërbim të banoreve të komunave fqinje”, tha ministri Sali.
Sipas tij, pajisja digjitale kap vlerën e 45 mijë eurove, prodhim nga “Siemens” dhe është me efikasitet të lartë.
“U bëj apel të gjitha grave të moshës 45 deri në 63 vjeç nga rajoni më i gjerë që të paraqiten në këtë institucion si pjesë e programit të skriningut. Gjithashtu me këtë program janë përfshirë edhe gratë e moshës 24 deri në 45 vjeç që kanë predispozita të kësaj sëmundje”, theksoi Sali.
Drejtoresha e spitalit Sevdie Koxha shprehu mirënjohje në emër të institucionit dhe ministrinë përkatëse.
“Për ne si institucion një pajisje e tillë ishte më se e nevojshme. Falënderojmë për kujdesin e ministrit dhe ministrisë, me përpjekjet e së cilës spitali i Dibrës për herë të parë në historinë e saj pajiset me një aparat të tillë”, tha Koxha.
Koxha dhe Sali, siç informuan, kanë biseduar edhe për problemin e mungesës së kuadrit të caktuar në spital.
