Day: June 6, 2026

Këngëtarja shqiptare, Ronela Hajati, ka vendosur të bëhet zëri i solidaritetit duke anuluar aktivitetet e saj muzikore të planifikuara për këtë fundjavë.

Përmes një postimi në rrjetet sociale, Ronela ka njoftuar se publikimi i këngës së saj të re në bashkëpunim me Capital T do të shtyhet për ditën e hënë, ashtu siç janë anuluar edhe koncertet apo eventet e tjera të fundjavës.

Në mesazhin e saj, Ronela thekson se ky vendim vjen si një shenjë respekti ndaj ngjarjeve të fundit që po tronditin vendin. “Si një vajzë që s’jam përfshirë kurrë në politikë, fare e pavarur, më duket gjëja më e vogël në respekt të një populli që është i vetmi që në fund të ditës më ka dëgjuar, rritur dhe mbështetur,” shkruan ajo, duke vendosur rëndësinë e kauzës përpara argëtimit.

Në fund të njoftimit të saj, këngëtarja u ka bërë thirrje ndjekësve dhe qytetarëve që t’i bashkohen protestës që do të mbahet sot në orën 18:00.

“Do kemi kohë për të kërcyer e për të dëgjuar muzikë gjithë kohës. Btw sot në 18:00 ka protestë, shihemi,” përfundon Ronela.

Ministri i Mjedisit Jetësor dhe Planifikimit Hapësinor, Muhamet Hoxha ditë më parë mori pjesë në Konferencën Ministrore të Procesit të Bashkëpunimit në Evropën Juglindore (SEECP), e mbajtur në Sofje, ku fokusi kryesor ishte adresimi i sfidave klimatike, tranzicioni i gjelbër dhe avancimi i bashkëpunimit rajonal në fushën e mjedisit.

Në margjinat e konferencës Hoxha realizoi takim me eurokomisioneren për Mjedisin, Qëndrueshmërinë e Burimeve Ujore dhe Ekonominë Qarkulluese Konkurruese, Jessika Roswall, me të cilën diskutoi për prioritetet mjedisore të vendit, procesin e harmonizimit me politikat evropiane dhe mundësitë për thellimin e bashkëpunimit me institucionet e Bashkimit Evropian.

Gjatë takimit u theksua rëndësia e veprimit të koordinuar përballë ndryshimeve klimatike, menaxhimit të qëndrueshëm të burimeve natyrore dhe përshpejtimit të tranzicionit drejt një ekonomie më të gjelbër dhe më konkurruese.

Ministri Hoxha vlerësoi mbështetjen e Bashkimit Evropian në zbatimin e reformave mjedisore dhe nënvizoi përkushtimin e vendit për të avancuar standardet evropiane në fushën e mbrojtjes së mjedisit dhe zhvillimit të qëndrueshëm.

Pjesëmarrja e eurokomisioneres Roswall në konferencë, sipas ministrit Hoxha, konfirmon rëndësinë që Bashkimi Evropian i kushton bashkëpunimit rajonal dhe përballjes së përbashkët me sfidat klimatike për një të ardhme më të qëndrueshme për qytetarët e rajonit.

Kryetari i Komunës së Tetovës, Bilall Kasami, promovoi sot linjën e re të transportit publik falas, Tetovë – Brodec – Veshallë – Bozovcë dhe anasjelltas, një projekt që synon të përmirësojë lëvizjen e banorëve të Malësisë së Tetovës drejt qytetit.

Gjatë promovimit, Kasami theksoi se linja do të funksionojë gjashtë ditë në javë dhe do të lehtësojë qasjen e banorëve në shërbimet publike, arsimin dhe aktivitetet ekonomike në Tetovë.

“Sot kemi kënaqësinë e veçantë që nga fshati Bozovcë të promovojmë linjën e transportit publik falas, të organizuar nga Komuna e Tetovës për fshatrat Brodec, Veshallë dhe Bozovcë. Kjo linjë do të funksionojë gjashtë ditë në javë. Nisja do të bëhet në orën 07:00 nga Bozovca, ndërsa në mbrëmje, në orën 17:30, do të ketë kthim nga Tetova. Ky është një projekt që e kemi premtuar dhe sot po fillojmë zbatimin e tij për të gjithë banorët e kësaj zone”, – tha Kryetari i Komunës së Tetovës, Bilall Kasami.

Kasami njoftoi gjithashtu se Tetova pritet të përfitojë pesë autobusë elektrikë përmes një projekti qeveritar, ndërsa komuna do të sigurojë edhe pesë minibusë për banorët e Malësisë së Tetovës.

“Presim që përmes projektit të Qeverisë për mbështetjen e transportit publik të sigurojmë pesë autobusë elektrikë. Po ashtu, nga buxheti i Komunës së Tetovës do të sigurohen edhe pesë minibusë. Me këtë po zgjerojmë çdo ditë shërbimet e transportit publik për të gjithë qytetarët e Tetovës, veçanërisht për banorët e Malësisë”, – deklaroi Kasami.

Linja e re pritet të lehtësojë qarkullimin e përditshëm të banorëve dhe vizitorëve, duke ofruar një alternativë të sigurt dhe të rregullt transporti ndërmjet Tetovës dhe vendbanimeve të Malësisë së Sharrit.

“Iniciativa e Shkupit” është një veprim për forcimin e bashkëpunimit rajonal ndërmjet partive socialdemokrate dhe progresive në rajon, deklaroi lideri i LSDM-së, Venko Filipçe, në një konferencë ndërkombëtare të organizuar nga LSDM dhe Shkolla e Lartë Politike e Korçulës. Sipas tij, rajoni po përballet me një sfidë serioze nga struktura autoritare, nacionaliste dhe korruptive, ndaj të cilave forcat progresive duhet të përgjigjen me unitet, bashkëpunim dhe veprim të përbashkët.

Ai vlerësoi se Ballkani Perëndimor ndodhet në një moment kyç, kur pas shumë vitesh ngecjeje ekziston sërish një mundësi reale për anëtarësim në Bashkimin Evropian.

“Brezi ynë ka një mundësi unike për ta përfunduar këtë proces. Kemi mundësinë jo vetëm të përmbushim një qëllim strategjik, por edhe të realizojmë ëndrrën shumëvjeçare të një brezi të tërë. Konteksti në të cilin veprojmë sot është shumë më ndryshe nga ai që dikur bashkonte spektrin politik dhe frymëzonte optimizëm të gjerë publik. Shoqëritë tona po përballen me rezistencën më serioze ideologjike në historinë e tyre të afërt. Forcat antievropiane janë më të organizuara se kurrë më parë dhe të vendosura ta vonojnë, në mos ta pengojnë plotësisht, integrimin evropian”, tha Filipçe.

Filipçe theksoi se nacionalizmi i brendshëm, populizmi, krimi i organizuar dhe ekstremizmi po veprojnë gjithnjë e më shumë së bashku kundër vlerave evropiane dhe proceseve reformuese. Ai shtoi se këto forca po inkurajohen edhe nga ngritja e së djathtës ekstreme në disa vende anëtare të BE-së.

“Këto forca jopërparimtare do të vazhdojnë të keqpërdorin çështjet e ndjeshme për përfitime politike. Veçanërisht shqetësuese është bashkëpunimi i ngushtë midis krimit të organizuar dhe strukturave nacionaliste-populiste. Rrjetet kriminale, të mbrojtura nga elitat politike jopërparimtare, kanë më së shumti frikë nga reformat në sundimin e ligjit që sjell integrimi evropian. Integrimi i suksesshëm do të kufizonte zonat gri ku ato veprojnë”, shtoi Filipçe.

Në fund, Filipçe theksoi se përgjigjja e vetme ndaj këtyre sfidave është krijimi i një koalicioni të fortë progresiv në nivel rajonal.

“Për ta mposhtur këtë koalicion të zi rajonal, duhet të përgjigjemi me unitet, vendosmëri dhe bashkëpunim afatgjatë”, deklaroi Filipçe.

Kujtojmë se, në samitin BE – Ballkani Perëndimor që u mbajt më 5 qershor në Tivat të Malit të Zi, liderët evropian porositën vendet e Ballkanit Perëndimor të “përveshin mëngët” dhe të përshpejtojnë reformat e tyre, në mënyrë që të përshpejtohet procesi i zgjerimit.

Maqedonia e Veriut mbetet e ngujuar në rrugëtimin drejt BE-së, shkaku i kontestit me Bullgarinë fqinje. RMV duhet t’i bëjë ndryshimet kushtetuese për të vazhduar rrugën drejt BE-së. Ndryshimi kushtetutës përfshin shtimin e bullgarëve dhe etnive tjera në Kushtetutë. Ndryshimi kërkon shumicë prej dy të tretash dhe negociatat me BE-në nuk do të fillojnë derisa të bëhen këto ndryshime.

Me kusht të ndryshimi të Kushtetutës, Maqedonia e Veriut më 19 korrik të vitit 2022 i filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik 2022. Propozimi atë kohë u votua në parlament pa pjesëmarrjen e opozitës së atëhershme e cila tani është në pushtet.

Lidhja Shqiptare në Tetovë ka akuzuar grupin politik të udhëhequr nga Arben Taravari se ka vepruar kundër partnerëve të koalicionit gjatë zgjedhjeve lokale të vitit 2025.

Sipas reagimit të kësaj partie, një këshilltare e afërt me Taravarin në Këshillin Komunal të Tetovës ka konfirmuar publikisht se grupi i tyre ka punuar kundër Ziadin Selës dhe kandidatëve të Lidhjes Shqiptare gjatë procesit zgjedhor.

“Tradhëtia brenda koalicionit AKI u konfirmua edhe publikisht, ndërsa ishte e qartë edhe gjatë zgjedhjeve dhe nga vetë rezultati zgjedhor”, thuhet në reagimin e Lidhjes Shqiptare, transmeton Zhurnal.mk.

Lidhur me këtë çështje ka reaguar edhe Arlind Murtezani, këshilltar i Lidhjes Shqiptare në Këshillin e Komunës së Tetovës, i cili vlerësoi se deklaratat e fundit kanë sqaruar arsyet e mosfunksionimit të koalicionit.

“Sot edhe BDI-ja, por edhe i gjithë opinioni publik e ka më të qartë se përse nuk funksionoi ky koalicion dhe pse erdhi ai rezultat zgjedhor”, ka deklaruar Murtezani.

Nga Lidhja Shqiptare vlerësojnë se zhvillimet e fundit vetëm sa kanë konfirmuar dyshimet që, sipas tyre, kanë ekzistuar që nga periudha e zgjedhjeve lokale.

Në një konferencë për shtyp, përfaqësuesi i koalicionit VLEN, Daut Memishi, ka deklaruar se vendi ndodhet “para një momenti historik”, duke iu referuar miratimit të ligjit për përfaqësim të drejtë dhe adekuat, të cilin ai e cilësoi si zbatim të drejtpërdrejtë të parimeve që burojnë nga Marrëveshja e Ohrit.

Sipas Memishit, përfaqësimi i drejtë dhe adekuat nuk është më vetëm parim kushtetues apo premtim politik, por tashmë po shndërrohet në detyrim ligjor për të gjitha institucionet. Ai theksoi se ky ligj, sipas tij, është vonuar për më shumë se dy dekada dhe se nuk është realizuar nga qeveritë e mëparshme, pavarësisht premtimeve të përsëritura.

Memishi kritikoi kundërshtarët politikë, duke thënë se kanë pasur mundësi dhe pushtet për ta miratuar një ligj të tillë, por nuk kanë pasur vullnet politik. Ai shtoi se ka pasur përpjekje për ta paraqitur Marrëveshjen e Ohrit si të përmbyllur, ndërsa, sipas tij, mungesa e këtij ligji tregon të kundërtën.

Në fund të deklaratës, ai theksoi se VLEN po e realizon këtë proces “brenda 25 muajve”, duke e krahasuar me periudhën shumë më të gjatë të mosveprimit të mëhershëm, dhe se sipas tij, për qytetarët është më e rëndësishme ekzistenca e një ligji mbrojtës sesa funksionet politike.

Deputeti i Bashkimit Demokratik për Integrim (BDI), Ilir Hasani, ka uruar Kushtrim Ahmetin për zgjedhjen e tij në postin e rektorit të Universitetit Shtetëror të Tetovës (USHT).

Përmes një reagimi publik, Hasani vlerësoi se fitorja e Ahmetit është dëshmi se vlerat profesionale dhe njerëzore vazhdojnë të gëzojnë respekt në shoqëri, pavarësisht ndikimeve politike.

“Fitorja e Kushtrimit më bindi se vlerat në shoqërinë tonë nuk kanë humbur, se shoqëria jonë akoma e kultivon bindjen se vlera e një njeriu të ndershëm, të dijshëm dhe të sinqertë është më e fuqishme se dëshirat e partive politike, bile edhe atëherë kur ata pretendojnë se janë të bashkuar”, ka shkruar Hasani, transmeton Zhurnal.mk.

Në fund të mesazhit të tij, deputeti i BDI-së i ka shprehur urimet Ahmetit për detyrën e re, duke shkruar shkurt: “Urime Kushtrim!”.

Kushtrim Ahmeti është zgjedhur rektor i Universitetit Shtetëror të Tetovës, një nga institucionet më të rëndësishme të arsimit të lartë në vend, ndërsa zgjedhja e tij ka nxitur reagime dhe urime nga figura të ndryshme të jetës publike dhe politike.

Qeveria italiane mohon çdo incident diplomatik, por anulimi i pjesëmarrjes së kryeministres në samitin BE-Ballkani Perëndimor ka nxjerrë në pah dallimet me Francën, Gjermaninë dhe Britaninë e Madhe për Ukrainën dhe Bosnjën.

Ndonjëherë edhe një pullë postare mund të fshehë një histori të tërë gjeopolitike.

Vendimi i kryeministres italiane Giorgia Meloni për të marrë pjesë në ceremoninë e vulosjes filatelike kushtuar përvjetorit të Arma dei Carabinieri në Reggio Calabria, një aktivitet që nuk ishte parashikuar fillimisht në axhendën e saj, ka nxitur diskutime mbi mungesën e saj në samitin BE-Ballkani Perëndimor në Tivat të Malit të Zi.

Ngjarja ka vënë në qendër të vëmendjes marrëdhëniet mes Melonit dhe tre liderëve kryesorë të të ashtuquajturit “Koalicioni i të Gatshmëve” mes Francës, Gjermanisë dhe Britanisë së Madhe, të cilët do të takohen së shpejti në Londër me presidentin ukrainas Volodymyr Zelensky, pa pjesëmarrjen e Italisë.

Qeveria italiane minimizon çdo interpretim politik dhe këmbëngul se nuk bëhet fjalë për ndonjë krizë diplomatike. Megjithatë, mungesa e Melonit ka tërhequr vëmendje, veçanërisht pasi samiti i Tivatit trajtonte zgjerimin e Bashkimit Evropian në Ballkan, një temë që kryeministrja italiane e ka mbështetur vazhdimisht.

Burime qeveritare në Romë vërejnë se formati i bashkëpunimit mes Francës, Gjermanisë dhe Britanisë së Madhe “ende nuk po arrin të konsolidohet” dhe mbetet larg qasjes së Melonit për çështje kyçe si dërgimi i trupave në Ukrainë, negociatat e paqes me Rusinë pa përfshirjen e SHBA-së dhe përshpejtimi i anëtarësimit të Ukrainës në Bashkimin Evropian.

Edhe pse Palazzo Chigi (Kryeministria italiane) mohon çdo lidhje mes mungesës së Melonit dhe mosmarrëveshjeve politike, fakti mbetet se në Tivat ajo do të kishte takuar presidentin francez Emmanuel Macron dhe kancelarin gjerman Friedrich Merz, dy nga figurat kryesore të mbështetjes evropiane për Ukrainën.

Nga qeveria italiane shprehen skeptikë për perspektivat e këtij grupimi, duke lënë të kuptohet se Roma nuk e ndan plotësisht të njëjtin vizion me Parisin dhe Berlinin.

Në sfond vazhdon edhe rivaliteti tradicional mes Italisë dhe Francës.

Një tjetër pikë përplasjeje është gara për postin e Përfaqësuesit të Lartë të komunitetit ndërkombëtar në Bosnjë-Hercegovinë. Italia mbështet kandidaturën e ambasadorit Antonio Zanardi Landi, ndërsa Franca promovon të dërguarin e saj për Ballkanin, René Troccaz.

Kandidati italian gëzon mbështetjen e fortë të Shteteve të Bashkuara, si dhe të Japonisë dhe Turqisë, ndërsa kandidati francez mbështetet nga Gjermania dhe Britania e Madhe.

Ky rreshtim diplomatik pasqyron edhe përpjekjet e Melonit për të rindërtuar marrëdhëniet me administratën e Donald Trumpit pas një periudhe tensionesh përpara samitit të G7-s në Francë dhe takimit të NATO-s në Turqi.

Në këtë kuadër shihet edhe vizita e planifikuar më 15 qershor në Uashington e ministrit italian të Mbrojtjes, Guido Crosetto, i cili do të takohet me sekretarin amerikan të Mbrojtjes, Pete Hegseth.

Por a qëndrojnë vërtet këto kalkulime politike pas mungesës së Melonit në Tivat?

Versioni zyrtar i qeverisë italiane është shumë më i thjeshtë.

Sipas Palazzo Chigi, nuk ka pasur asnjë incident diplomatik. Ceremonia në Reggio Calabria zgjati më shumë se sa ishte parashikuar, pjesërisht për shkak të pritjes së rezervuar për kryeministren.

Kur stafi i saj kuptoi se nuk do të arrinte në kohë në Mal të Zi, Meloni vendosi të pranonte ftesën për aktivitetin në prefekturë dhe të hiqte dorë nga pjesëmarrja në samit.

Ajo pritej të mbërrinte në Tivat rreth orës 15:00 sipas programit zyrtar, kur samiti ishte pothuajse drejt përfundimit. Në praktikë, pjesëmarrja e saj do të ishte kufizuar në rreth 30 minuta, para fotografisë tradicionale familjare dhe konferencës së përbashkët për shtyp të presidentes së Komisionit Evropian Ursula von der Leyen dhe presidentit të Këshillit Evropian António Costa.

Pas ceremonisë në Reggio Calabria, Meloni njoftoi presidentin malazez Jakov Milatović dhe António Costën për mungesën e saj dhe qëndroi rreth gjysmë ore në prefekturë për aktivitetin filatelik.

Më pas, avioni qeveritar u kthye në Romë me gjithë delegacionin zyrtar. Kryeministrja mbërriti në kryeqytetin italian rreth orës 15:30.

Zyrtarisht, gjithçka ishte vetëm një problem organizativ.

Por në një moment kur Evropa po diskuton Ukrainën, zgjerimin e BE-së dhe të ardhmen e Ballkanit, mungesa e Melonit në një samit të tillë vazhdon të ngjallë pyetje që shkojnë përtej axhendës së një dite./ Corriere della Sera

Më 6 qershor 1998, HBO transmetoi episodin e parë të serialit Sex and the City – një projekt që filloi si përshtatje e kolumnave të shkrimtares Candace Bushnell dhe u shndërrua në një nga fenomenet më të mëdha të kulturës pop.

Seriali fillimisht u konsiderua kontrovers, por edhe si një format i freskët televiziv, sepse fliste hapur për miqësinë mes grave, dashurinë, karrierën, pavarësinë dhe jetën në një qytet të madh.

Në qendër të rrëfimit janë katër gra në New York City: Carrie Bradshaw, Samantha Jones, Charlotte York dhe Miranda Hobbes. Përmes lidhjeve të tyre dashurore, sfidave profesionale dhe dilemave personale, seriali krijoi një pasqyrë të gruas moderne në fund të shekullit XX.

Sarah Jessica Parker luajti rolin e Carrie Bradshaw, kolumniste dhe ikonë mode, ndërsa Kim Cattrall si Samantha, Kristin Davis si Charlotte dhe Cynthia Nixon si Miranda formuan një nga katërshet më të njohura femërore në historinë e televizionit.

Një nga simbolet më të fuqishme të serialit ishte moda. Falë kostumografes Patricia Field, Carrie Bradshaw u bë ikonë stili, ndërsa kombinime si fundi i famshëm prej tyli në hyrjen e serialit u bënë pjesë e historisë së modës. Ndërkohë, New York-u nuk ishte thjesht një vend ku zhvillohej ngjarja, por pothuajse personazhi i pestë i serialit.

“Seksi dhe Qyteti” pati gjashtë sezone dhe 94 episode, të transmetuara deri në vitin 2004. Seriali fitoi shtatë çmime Primetime Emmy Awards dhe tetë Golden Globe Awards, por trashëgimia e tij e vërtetë qëndron në faktin se ndryshoi mënyrën se si tregimet e grave paraqiten në televizion.

Megjithatë, seriali nuk kaloi pa kritika. Një pjesë e publikut dhe kritikëve vlerësonin se ai paraqiste një New York të privilegjuar, urban dhe jo mjaftueshëm të larmishëm, si dhe se historitë e dashurisë ndonjëherë ishin jorealiste dhe elitare.

Pavarësisht kësaj, ndikimi i serialit mbetet i jashtëzakonshëm. Pas tij u realizuan dy filma, në vitet 2008 dhe 2010, ndërsa në vitin 2021 HBO Max publikoi vazhdimin And Just Like That…, i cili ndjek Carrie-n, Miranda-n dhe Charlotte-n në një fazë të re të jetës së tyre.

Më shumë se dy dekada më vonë, “Seksi dhe Qyteti” mbetet një serial që përcaktoi kohën e vet – me dialogë të mençur, modë të paharrueshme dhe histori miqësie femërore që vazhdojnë të jenë aktuale edhe sot.

Një 44-vjeçar i akuzuar si pjesëtar i një grupi kriminal është ekstraduar nga Italia drejt Shqipërisë, në kuadër të bashkëpunimit mes Interpol Tiranës dhe Interpol Romës.

Sipas njoftimit zyrtar, në kuadër të operacionit ndërkombëtar “The Wanted”, u finalizuan procedurat për ekstradimin e shtetasit Sajmir Kolaveri, i shpallur në kërkim ndërkombëtar nga autoritetet shqiptare.

Gjykata e Posaçme kundër Korrupsionit dhe Krimit të Organizuar (GJKKO), me vendimin e datës 25 shtator 2025, i ka caktuar masën e sigurisë “Arrest në burg”, për një sërë veprash të rënda penale, mes të cilave “Vrasja për gjakmarrje”, “Fshehja ose asgjësimi i kufomës”, si dhe veprat që lidhen me grupin e strukturuar kriminal dhe armëmbajtjen pa leje.

Sipas hetimeve, Kolaveri dyshohet se më 5 gusht 2020 ka bashkëpunuar me pjesëtarë të tjerë të grupit kriminal për vrasjen e Klevis Lleshit. Pas ekzekutimit, ai dyshohet se ka marrë pjesë edhe në transportimin dhe varrosjen e kufomës në fshatin Shpërdhet të Mamurrasit, me qëllim fshehjen e krimit.

Pas mbërritjes në Shqipëri, 44-vjeçari iu dorëzua autoriteteve kompetente për vijimin e procedurave ligjore.