Bayerni ngec ndaj Kölnit, Kane largohet i dëmtuar, Dortmundi mund ta kalojë nesër

Bayerni u ndal në barazim 1-1 ndaj Kölnit në “Allianz Arena”, në ndeshjen që hapi javën e 10-të të Bundesligës. Bavarezët humbën dy pikë dhe pas 20 minutash humbën edhe Harry Kane-in, i cili u largua i dëmtuar.

Mysafirët shënuan të parët. Në minutën e 12-të, pas një kundërsulmi, Mikey Moore e kaloi Kölnin në avantazh. Ishte një goditje e rrallë për Bayernin, i cili deri në këtë ndeshje kishte pësuar vetëm një gol në pjesën e parë në gjithë sezonin e Bundesligës.

Bayerni barazoi në minutën e 37-të. Tom Bischof, i cili kishte hyrë në vend të Kane-it, gjeti Nathaniel Brownin. Ky u rrotullua para Jahmai Simpson-Puseyt dhe goditi fort e poshtë, duke e mposhtur portierin Marvin Schwäbe.

Kane dhe Olise jashtë me dëmtime

Lajmi më i keq për Bayernin ishte dëmtimi i Kane-it. Sulmuesi anglez u largua rreth minutës së 20-të me dëmtim në kyçin e këmbës së majtë. Në pushim mbeti në dhomat e zhveshjes edhe Michael Olise, pas një goditjeje në këmbë. Sa të rënda janë dëmtimet nuk dihet ende.

Lajmi i vetëm pozitiv për bavarezët ishte rikthimi në fushë i Jamal Musialës.

Kölni afër fitores

Bayerni e mbajti topin më shumë, por krijoi pak. Nga 14 goditje gjatë gjithë ndeshjes, vetëm dy shkuan në portë, ndërsa Kölni pati katër goditje në portë. Lennart Karl pati rastin më të mirë të Bayernit në minutën e 55-të. Megjithatë, ishte Kölni ai që iu afrua më shumë fitores: në minutën e 85-të, Said El Mala humbi një rast të pastër për golin e fitores.

Dortmundi mund të kalojë në krye

Me këtë barazim, Bayerni mbetet në krye të tabelës me 22 pikë nga 10 ndeshje. Është ende i pamposhtur, por ka katër barazime. Borussia Dortmund ka 21 pikë me një ndeshje më pak. Nesër luan në transfertë me Borussia Mönchengladbachun nga ora 15:30 dhe me një fitore e kalon Bayernin në krye.

Burimi: botasot.info