Shkup, 15 nëntor – Sekretarja franceze e Shtetit për Evropën dhe Punët e Jashtme, Lorans Bon, gjatë vizitës së saj në Shqipëri dhe në Maqedoninë e Veriut, do të sjellë mesazh për miqësi dhe mbështetje për perspektivën evropiane, njofton korrespondenti i MIA-s.
Bon, përgjegjëse për Evropën në Ministrinë e Evropës dhe Punëvet e Jashtme, do ta vizitojë Shqipërinë dhe Maqedoninë e Veriut nga data 14 deri më 16 nëntor, konfirmoi Kej D’Orsej me një komunikatë zyrtare.
“Kjo vizitë është rezultat i arritjeve të Francës gjatë presidencës së saj me Këshillin e Bashkimit Evropian, me qëllim hapjen e negociatave aderuese me Shqipërinë dhe Maqedoninë e Veriut”, theksohet në komunikatën nga Parisi zyrtar.
Gjatë vizitës, sekretarja e Shtetit do të përcjellë një mesazh miqësie dhe mbështetjeje për perspektivën evropiane të secilit prej këtyre dy vendeve, duke nënvizuar hapat që do të ndërmerren. Ajo do të diskutojë gjithashtu projektet e bashkëpunimit, të cilat me siguri do të zhvillohen, përfshirë edhe brenda komunitetit politik evropian, në mënyrë që Shqipëria dhe Maqedonia e Veriut të mund të korrin përfitimet konkrete të përpjekjeve që i kanë bërë.
Lorans Bon gjatë vizitës në Shkup, do të takohet me presidentin e vendit, kryeministrin, si dhe me disa ministra dhe deputetë të Këshillit kombëtar për integrime evropiane të Maqedonisë së Veriut.
Janë planifikuar edhe shkëmbime me përfaqësues të shoqërisë civile, veçanërisht të rinjtë, si dhe think-tanke për thellimin e dialogut rreth çështjeve historike, kulturore dhe sociale
