Ish-ushtari i Ushtrisë Çlirimtare Kombëtare (UÇK) dhe ish-deputeti Hisni Shaqiri, në një prononcim për Indeks.mk ka komentuar deklaratat e eksponentëve të opozitares VMRO-DPMNE, të cilat nxisin dhunë ndër-etnike dhe thërrasin në luftë. Ai thotë se këto deklarata nuk i shërbejnë askujt, dhe se sipas tij me deklarata të tilla nuk ndërtohet bashkëjetesa.
“Në Maqedoni në përgjithësi politika e disa qarqeve ende jeton me të kaluarën dhe tenton që gjithçka të arrijë duke sulmuar shqiptarët. Shqiptarët nuk duhet të bien pre e këtyre provokimeve, pasi që ato nuk imponojnë asgjë, por as nuk pranojnë t’u imponohet. Nuk ndërtohet bashkëjetesa me deklarata të tilla që bëjnë thirrje për luftë”, deklaroi Shaqiri për Indeks.mk
Deputeti i VMRO-DPMNE-së, Aleksandër Nikollovski ka deklaruar se hyrja e të gjitha partive shqiptare në Qeveri, do të shkatërrojë themelet e funksionimit të shtetit të Maqedonisë, që sipas tij, bazohet nën modelin – dy parti politike në pushtet, dy në opozitë.
“Në Maqedoni jo rastësisht ekzistojnë parti të maqedonasve, shqiptarëve, serbëve, turqve, vllahëve, romëve. Shikoni rreth vetes dhe do të shihni kë e keni në koalicion. Kjo është kështu për shkak të balancit etnik me të cilin funksionon ky shtet. Ju nëse dëshironi mund të eksperimentoni, por ato eksperimente do të na çojnë në rrënimin e Maqedonisë siç e njohim sot. Eksperimente të një gjenerate para nesh na sollën në konflikt të armatosur në vitin 2001. Kam frikë se eksperimentet që po i bëni tani, mund të na çojnë në një konflikt tjetër; dhe nëse në 2001 u ngritën shqiptarët, tani mund të ngritën maqedonasit. Mos e nënvlerësoni këtë që po ua them”, tha Nikollovski.
