Një person humbi jetën dhe tre të tjerë u plagosën pasi një pjesë e një vinçi ra nga një ndërtesë në qytetin amerikan të Fort Lauderdale, Florida.
Sipas mediave të huaja, ekuipazhet ishin në proces të rritjes së lartësisë së vinçit kur një pjesë e tij “u lirua”, thanë zyrtarët.
Pamjet nga vendi i ngjarjes tregojnë se struktura e madhe metalike ra mbi një makinë që po kalonte një urë, duke shtypur pjesën e përparme të saj.
Një punëtor ndërtimi thuhet se ka humbur jetën pasi ka rënë me pjesën e vinçit ndërsa dy prej të lënduarve u dërguan në spital ndërsa një i tretë u trajtua në vendngjarje.
Zyrtarët thanë se incidenti ndodhi rreth orës 16:30 me orën lokale të së enjtes.
Një shofer ka treguar se makina e tij u dëmtua nga rënia e pjesës së vinçit.
“… Jam shumë me fat që jam gjallë”, ka thënë ai.
Ndërkohë një grua tjetër që jeton aty pranë tha se britmat e dëgjuara nga punëtorët e ndërtimit në momentin e shembjes ishin “shqetësuese”.
