Zv/kryeministri Izet Mexhiti ka njoftuar se sot kanë ndjekur nga afër stërvitjet e pjesëtarëve të forcave të armatosura të Maqedonisë së Veriut, SHBA-së, Shqipërisë, Kosovës, Greqisë, Italisë, Malit të Zi, Mbretërisë së Bashkuar dhe Austrisë që u realizuan në Krivollak në kuadër të ushtrimit ndërkombëtar “Përgjigje e Shpejtë 2025”, pjesë e stërvitjes së gjerë DEFENDER Europe 25, një nga operacionet më të mëdha të NATO-s për vitin 2025.
“Për Maqedoninë e Veriut, pjesëmarrja në këtë stërvitje përfaqëson një angazhim të qartë ndaj sigurisë kolektive dhe përforcimit të kapaciteteve tona mbrojtëse. Ushtrime të këtij niveli janë thelbësore për ndërtimin e ndërveprueshmërisë me aleatët tanë dhe për përgatitjen e përbashkët për t’u përballur me sfidat e sotme dhe të ardhshme të sigurisë”, ka deklaruar zv/kryeministri Mexhiti.
