Me një manifestim solemn që do të mbahet më 19 qershor 2026, në ora 19:00, në Kishën “Shën Palit”, “Fondi Humanitar Trieshi” do të shënojë 10-vjetorin e veprimtarisë së tij humanitare dhe kombëtare. Duke vlerësuar këtë jubile të rëndësishëm, Drejtori i shkollës shqipe në Michigan, Agron Dedivanaj, e cilësoi Fondin Humanitar Trieshi si një nga shembujt më të mirë të organizimit dhe solidaritetit të diasporës shqiptare, e cila për një dekadë ka dëshmuar përkushtim të vazhdueshëm ndaj vendlindjes dhe njerëzve në nevojë. Sipas Dedivanajt, dhjetëvjetori i fondit është një dëshmi e gjallë e unitetit, humanizmit dhe lidhjes së pandërprerë që bashkatdhetarët në Amerikë dhe kudo në diasporë vazhdojnë të mbajnë me Trieshin dhe Malësinë. Mbrëmja festive do të shoqërohet me një program artistik ku do të performojnë Hanë Nikprelaj, Fran Lucaj, Kol Nikprelaj, Maria Lajçaj, Marian Micakaj dhe Nikollë Nikprelaj, ndërsa do të nderohen themeluesit dhe kontribuuesit që kanë mbështetur misionin e fondit gjatë këtyre dhjetë viteve. Ky përvjetor pritet të mbledhë bashkë shumë bashkatdhetarë dhe miq të Trieshit, në një mbrëmje kushtuar humanizmit, solidaritetit dhe krenarisë shqiptare. Ja postimi i plotë: MBRËMJE MADHËSHTORE NË NDER TË 10-VJETORIT TË FONDIT HUMANITAR TRIESHI Në një atmosferë krenarie kombëtare, respekti për trashëgiminë tonë dhe mirënjohjeje për kontributin e diasporës shqiptare, më 19 Qershor 2026– Ora 7:00 PM, në Kishë “Shën Palit”do të mbahet manifestimi solemn me rastin e 10-vjetorit të “Fondit Humanitar Trieshi”. Ky jubile shënon jo vetëm dhjetë vite ekzistence të një fondi humanitar, por dhjetë vite sakrifice, përkushtimi, uniteti dhe dashurie të pakushtëzuar për vendlindjen. Për një dekadë të tërë, “Fondi Humanitar Trieshi” ka qenë një shembull i shkëlqyer i asaj që mund të arrihet kur shqiptarët bashkohen rreth idealeve të përbashkëta, duke lënë mënjanë dallimet dhe duke vendosur në plan të parë interesin e komunitetit, ndihmën për nevojtarët dhe ruajtjen e identitetit tonë kombëtar. Në rrjedhën e historisë sonë, Trieshi ka qenë gjithmonë vatër burrërie, qëndrese, besnikërie dhe krenarie shqiptare. Nga këto troje kanë dalë breza të tërë që kanë mbrojtur nderin, gjuhën, traditat dhe flamurin e kombit tonë. Sot, po ai shpirt jeton dhe frymon në zemrat e bashkëatdhetarëve tanë në Amerikë, të cilët, edhe pse larg maleve të vendlindjes, nuk e kanë harruar kurrë tokën e të parëve. Përmes “Fondit Humanitar Trieshi”, diaspora jonë ka dëshmuar se malli për vendlindjen nuk shuhet me largësinë. Përkundrazi, ai shndërrohet në forcë, në vepra konkrete dhe në ndihmë të vazhdueshme për komunitetin. Çdo aktivitet, çdo kontribut dhe çdo nismë e realizuar gjatë këtyre dhjetë viteve ka qenë dëshmi e gjallë e lidhjes së pandashme mes diasporës dhe trojeve tona. Manifestimi i 19 Qershorit do të jetë një festë e madhe e unitetit shqiptar, një natë që do të bashkojë breza të ndryshëm rreth idealeve të përbashkëta të humanizmit, atdhedashurisë dhe respektit për historinë tonë. Në këtë mbrëmje do të kujtohen me nderim themeluesit, kontribuuesit dhe të gjithë ata që me zemër të madhe kanë mbështetur misionin e fondit ndër vite. Programi artistik do të sjellë këngë patriotike, muzikë tradicionale dhe interpretime që pasqyrojnë shpirtin e Malësisë dhe krenarinë shqiptare, ku do të performojnë këngëtarë të mëdhej të këngës shqipe si, Hanë Nikprelaj, Fran Lucaj, Kol Nikprelaj, Maria Lajçaj, Marian Micakaj dhe Nikollë Nikprelaj.Përmes fjalëve, këngëve dhe kujtimeve do të rikujtohet rrugëtimi dhjetëvjeçar i një organizate që është bërë simbol i bashkimit dhe solidaritetit ndër shqiptarë. Kjo mbrëmje nuk është vetëm një përvjetor. Është një homazh për vendlindjen, një përkulje para sakrificave të brezave që ruajtën identitetin tonë kombëtar dhe një zotim se edhe brezat e rinj do të vazhdojnë ta mbajnë lart emrin e Trieshit, Malësisë dhe gjithë kombit shqiptar. Sot më shumë se kurrë, kur shqiptarët jetojnë e veprojnë në të gjitha anët e botës, është e rëndësishme të kujtojmë se forca jonë qëndron te uniteti, te respekti për rrënjët tona dhe te dashuria për njëri-tjetrin. “Fondi Humanitar Trieshi” është një shembull i ndritur i kësaj force, një urë që lidh zemrat e bashkëkombësve tanë përtej oqeanit me vendlindjen e tyre. Prandaj, me krenari dhe respekt, ftojmë të gjithë bashkëatdhetarët, miqtë dhe dashamirët e Trieshit të marrin pjesë në këtë manifestim historik dhe të bëhen pjesë e një nate që do të mbetet gjatë në kujtesën e komunitetit tonë. Le të bashkohemi nën Flamurin Kuqezi për të festuar një dekadë suksesi, solidariteti dhe shërbimi ndaj njerëzve tanë. Nder dhe mirënjohje diasporës shqiptare! Rroftë Trieshi krenar! Rroftë Malësia heroike! Rroftë kombi shqiptar dhe Flamuri ynë Kuqezi!