Shkup, 23 nëntor – Republika e Maqedonisë së Veriut merr këstin e parë prej 110 milionë euro nga totali i miratuar nga Fondi Monetar Ndërkombëtar përmes Instrumentit për maturi dhe likuiditet (PLL). Fondet bëhen të disponueshme pasi Bordi i drejtorëve të FMN-së miratoi programin dyvjeçar të Republikës së Maqedonisë së Veriut në kuadër të Instrumentit për maturi dhe likuiditet.
“Politikat që ne po zbatojmë kanë mundësuar qasjen e vendit në këtë Instrument, i cili mundëson sigurimin e fondeve me kushte shumë më të favorshme se sa është aktuale në tregjet financiare. Kjo do të thotë se janë siguruar mjete për politikat e planifikuara me ribalancimin e buxhetit deri në fund të këtij viti, mjete për përballimin e goditjes që vjen nga jashtë, fonde për mbështetjen e qytetarëve dhe kompanive dhe mbi të gjitha më e rëndësishmja është të sigurojë stabilitet në furnizimin me ushqime dhe energji, tha ministri i Financave Fatmir Besimi.
Sipas tij, ky është një konfirmim nga Fondi Monetar Ndërkombëtar për politikat e shëndosha dhe të qëndrueshme që ka bërë Qeveria gjatë periudhës së kaluar në të cilën po përballemi me krizë, por edhe politikat që janë planifikuar për periudhën e ardhshme. të cilat synojnë përshpejtimin e rritjes ekonomike afatmesme.
Nga ana tjetër, me vendimin e Bordit të Drejtorëve të FMN-së, Republika e Maqedonisë së Veriut ka qasje në gjithsej 530 milionë euro. Prej tyre 110 milionë euro do të tërhiqen menjëherë dhe do të përdoren deri në fund të këtij viti kalendarik, ndërsa kësti i radhës prej 155 milionë eurosh do të përdoret gjatë vitit 2023. Pjesa e mbetur jepet vetëm si masë paraprake dhe rezervë e vendit.
Instrumenti i kujdesshëm dhe i likuiditetit i FMN-së synohet për vendet anëtare të këtij institucioni financiar ndërkombëtar që kanë dëshmuar baza të shëndosha ekonomike dhe zbatojnë politika të qëndrueshme. Instrumenti u prezantua në vitin 2011.
