Shkup, 4 tetor – Kemi ndërmarrë dhe do të ndërmarrim një sërë masash për të shmangur rritjen e çmimit të energjisë elektrike. Të shohim se ku jemi, çfarë jemi, të analizojmë, pastaj do të shohim nëse do të ketë rritje apo ulje të çmimit të energjisë elektrike, deklaroi sot kryetari i Komisionit Rregullator për Energji, Marko Bislimoski, duke iu referuar rritjes së mundshme të energjisë elektrike në fillim të vitit të ardhshëm, për shkak të krizës aktuale energjetike.
Ai në paraqitjen e tij në “TV 24”, theksoi se kanë vendosur edhe bllok tarifat për të parë se çfarë ndikimi do të kenë në konsum. Blloqet, siç tha ai, janë futur për të ndikuar në konsumin e amvisërive, ndërsa tani po punohet edhe për futjen e blloqeve për konsumatorët e vegjël që janë në tregun e rregulluar.
“Nëse bëjmë thirrje që të gjithë të kthehen në tregun e rregulluar, ESM do të duhet të bëjë importe shtesë, ndaj duhet të bëhet një pasqyrë e qartë se kush dhe si të ndihmojë. Duhet të ndihmohen absolutisht të gjitha kompanitë që kanë një proces prodhimi. Duhet të ndihmohen shkollat fillore, shkollat e mesme, institucionet e arsimit të lartë. Pjesërisht duhet të ndihmohen edhe ndërmarrjet publike, tha Bislimoski.
Kryetari i KRRE-së vlerësoi se çmimi i energjisë elektrike mund të mos rritet, duke treguar se duhet parë se si do ta mbyllë vitin ESM, me sa prodhim, duhet parë se çfarë obligime shtesë do t’i jepen ESM-së, e më pas duhet të bëj një analizë.
“KRRE sa herë që ka qenë kritike dhe problematike, nuk ka pasur frikë nga marrja e përgjegjësive dhe rritja e çmimit të rrymës, dhe tani të ndalemi dhe të shohim se ku jemi, çfarë jemi dhe si do të vazhdojmë, theksoi Bislimoski.
Duke folur për situatën aktuale, ai tha se burimet e brendshme duhet të shfrytëzohen maksimalisht në vend, nga ku mund të sigurohen burime të lira, për të siguruar dhe për të marrë energji elektrike më të lirë, para së gjithash për ekonominë.
“Ajo që është fakt është se nga 1 janari e deri më sot Komisioni Rregullator i Energjisë ka lëshuar licencat për prodhimin e energjisë elektrike nga fotovoltaikët në vlerë prej 70 megavat. Kjo është po aq sa ka “Shpillje”. Pra, për vetëm nëntë muaj kompanitë tona, kompanitë private vendore, kanë instaluar fotovoltaikë me kapacitet prej 70 megavatësh, theksoi Bislimoski.
Lidhur me negociatat për “Te-to”, kryetari i KRRE-së theksoi se Komisioni nuk iu bashkua negociatave me Bullgarinë, Serbinë apo Turqinë. Përveç kësaj, siç tha ai, KRRE nuk mund të blejë qymyr, naftë, gaz natyror, këtë e bëjnë institucionet dhe kompanitë e tjera, por ajo që bën KRRE është thjeshtimi i disa procedurave për të përfunduar të gjitha këto aktivitete.
“Atë që kemi konsideruar si Komisioni Rregullator i Energjisë, e kemi bërë. Në vendimin tonë për çmimin e energjisë termike, ne kemi paraparë që “Te-to” të punojë për të gjithë sezonin e ngrohjes në mënyrë që të marrim më shumë se dy herë më të lirë çmimin e energjisë termike, dhe gjithashtu “Te-to” është thelbësor për sistemin elektroenergjetik me qëllim të stabilizimit të gjendjes aktuale në qytetin e Shkupit. Besoj se të gjithë me mendje të shëndoshë do të bëjnë gjithçka për të siguruar prodhimin e energjisë elektrike nga “Te-to”, theksoi Bislimoski.
