Ish-presidenti i Republikës Srpska, Milorad Dodik, ndërsa ende ishte në krye të këtij entiteti të Bosnjë dhe Hercegovinës, ka udhëtuar të paktën pesë herë jashtë vendit, edhe pse ndaj tij ishte shpallur një fletarrest qendror në kuadër të një procesi gjyqësor.
Kontroversat mbi kalimet e tij të kufirit nuk kanë pushuar as pas heqjes së mandatit të presidentit të RS për shkak të një vendimi gjyqësor të formës së prerë dhe as pasi Gjykata e BiH i hoqi masën e paraburgimit.
Rasti i fundit i diskutueshëm ndodhi më 21 gusht, kur në media u publikua se Policia Kufitare e BiH i kishte mundësuar Dodikut trajtim VIP në aeroportin e Banjallukës, prej nga ai udhëtoi për në Beograd.
Vetë udhëtimi në Beograd nuk do të ishte problematik, por i tillë ishte privilegji i statusit VIP që iu dha si president i RS, edhe pse ai zyrtarisht nuk e ushtronte këtë funksion prej 18 gushtit.
Më 26 shkurt, Gjykata e BiH e dënoi Dodikun me një vit burg dhe me ndalim të ushtrimit të funksionit të presidentit të Republikës Srpska për gjashtë vite, duke filluar nga data e hyrjes në fuqi të vendimit.
Ai u shpall fajtor për nënshkrimin e dekretit për shpalljen e ligjeve që më herët ishin anuluar nga përfaqësuesi i lartë në BiH, Christian Schmidt. Përmes atyre ligjeve, autoritetet e RS tentuan të pengonin zbatimin e vendimeve të Gjykatës Kushtetuese të BiH dhe të vetë përfaqësuesit të lartë.
Pas kësaj, Kuvendi i RS miratoi një set ligjesh me të cilat shfuqizonte kompetencat e institucioneve gjyqësore dhe policore shtetërore në territorin e entitetit. Për këtë arsye, më 17 mars, Gjykata e BiH shpalli një fletarrest qendror ndaj Dodikut për dyshime mbi “sulm ndaj rendit kushtetues”, pasi ai nuk iu përgjigj thirrjes së Prokurorisë për marrje në pyetje.
Në bazë të fletarrestimit, Dodikun duhej ta arrestonte çdo agjenci policore apo drejtori e sigurisë në BiH, përfshirë Policinë Kufitare.
Pas disa muajsh shmangie nga arrestimi, më 4 korrik, Dodik iu paraqit vullnetarisht Prokurorisë së BiH, i shoqëruar nga avokatët e tij, ku u mor në pyetje si i dyshuar për “sulm ndaj rendit kushtetues”. Gjykata i hoqi masën e paraburgimit, duke i vendosur detyrim paraqitjeje, çka praktikisht i lejoi sërish lëvizjen e lirë jashtë vendit.
Pesë udhëtime jashtë vendit ndërkohë që ishte nën fletarrest
Nga 17 marsi deri më 4 korrik, kur ishte teknikisht i ndaluar të largohej nga BiH, Dodik udhëtoi të paktën pesë herë jashtë vendit:
24 mars: kaloi kufirin tokësor për në Serbi dhe mori pjesë në Batajnicë në ceremoninë për përvjetorin e bombardimeve të NATO-s. Policia Kufitare njoftoi për një hetim, por rezultatet nuk u bënë të ditura.
26-27 mars: udhëtoi në Jerusalem, në një konferencë mbi antisemitizmin, me avionin e Qeverisë së RS nga Beogradi.
1 prill: u takua në Moskë me presidentin rus Vladimir Putin. Ai tha se Putin i kishte premtuar mbështetje për mbylljen e institucioneve ndërkombëtare në BiH.
9 maj: sërish në Moskë, për të marrë pjesë në kremtimin e 80-vjetorit të fitores mbi fashizmin. Pretendoi se ishte takuar katër herë me Putinin gjatë vizitës.
5 qershor: në Budapest u takua me kryeministrin hungarez Viktor Orbán, me të cilin diskutoi projektet që më herët i kishte mbështetur Gjermania, por i ndërpreu për shkak të politikave separatiste të RS.
Humbja e mandatit dhe pranimi i dënimit
Në qershor dhe gusht, Gjykata e BiH konfirmoi dënimin me një vit burg dhe gjashtë vite ndalim funksioni publik. Më 18 gusht, Komisioni Qendror i Zgjedhjeve i hoqi zyrtarisht mandatin presidencial.
Edhe pse publikisht Dodik e kundërshtoi vendimin, ai praktikisht e pranoi atë kur kërkoi që dënimi me burg t’i zëvendësohej me gjobë. Gjykata e pranoi kërkesën dhe ai tani duhet të paguajë rreth 18 mijë euro.
Ndërkohë, ai ka vazhduar të udhëtojë – përfshirë një takim në Herceg Novi më 7 gusht me ish-emisarin amerikan për Ballkanin, Richard Grenell, sipas mediave malazeze.
Rasti i fundit: trajtim VIP në Banjallukë
Më 21 gusht, Dodik përfitoi trajtim VIP në aeroportin e Banjallukës, ndonëse nuk kishte më status presidencial. Policia Kufitare e BiH njoftoi se po verifikon faktet dhe rrethanat e kalimit të tij.
Në Beograd, ai mori pjesë vetëm në një ndeshje basketbolli mes Serbisë dhe Sllovenisë, ku ndryshe nga Banjalluka, nuk u trajtua si burrë shteti.
