Shkup, 22 shtator – Edicioni i gjashtë i Festivalit mediatik në Shkup, kushtuar trajtimit mediatik të mjedisit jetësor, do të mbahet prej sot e deri të shtunën në Kinotekë, në organizim të Platformës për gazetari hulumtuese dhe analiza-PINA.
Festivali hapet me një diskutim për pasqyrimin e çështjeve që lidhen me mjedisin dhe ndryshimet klimatike në mediat e vendit, pasuar nga një shfaqje e dokumentarit “Thellë në akull”, një udhëtim i tre eksploruesve nëpër rajonet e akullta të Grenlandës.
Për temën e festivalit të këtij viti do të flasë edhe gazetarja gjermane Sara Shurman, e cila onlajn të premten do të ndajë udhëzime për raportim efektiv gazetaresk mbi krizën klimatike.
Ditën e fundit të festivalit në Kinotekë do të zhvillohet një diskutim për çështjen lokale të sipërfaqeve të gjelbra dhe zhvillimin urban. Dita e dytë e festivalit megjithatë, fillon me një diskutim të mbulimit mediatik të të drejtave të personave pa shtetësi, refugjatët, migrantët dhe azilkërkuesit.
“Që nga themelimi i PINA-s, organizata ndjekë me përkushtim problemet dhe sfidat që prekin gazetaret femra në Maqedoninë e Veriut, që vazhdon të jetë në fokus të këtij edicioni të festivalit. Më 23 shtator shfaqet për herë të parë në Kinotekë filmi dokumentar me metrazh të shkurtër nga PINA ‘Rrjetet e rrezikshme’ dhe do të prezantohet botimi ‘Nga normalizimi në autocensurë’ për ngacmimet onlajn të grave gazetare në vend. Ky është publikimi i parë i PINA-s dhe paraqet një hulumtim dhe analizë të plotë, në të cilën janë anketuar më shumë se 100 gazetare femra nga skena e medias vendase, me qëllim që të mbledhin përvojat e tyre për ndikimin e ngacmimit onlajn mbi to dhe punën e tyre”, njofton PINA.
Pas diskutimit do të vijojë shfaqja e “Vrasja e një gazetari” i cili dokumenton përpjekjet e gazetarëve për të hedhur dritë mbi vrasjen brutale të gazetarit sllovak, Jan Kuciak dhe partneres së tij, Martina Kushnirova.
