Shkup, 24 dhjetor – Pasi sot Arben Taravari u zgjodh si i pari i Aleancës për Shqiptarët, urimet e para nga liderët politik erdhën pikërisht nga dy liderët tjerë të partive politike Lëvizja Besa e Alternativa.
Zgjedhjen e tij si kryetar partie nuk nguroi ta urojë kryetari i Lëvizjes Besa, Bilall Kasami, informon Zhurnal.
Kasami shkurtimisht uroi Taravarin për zgjedhjen e tij si kryetar partie, ndërsa i uroi sukses në sfidat e ardhshme.
“Shprehi urimet më të përzemërta për zgjedhjen e kryetarit të ri të ASH-së, z.Arben Taravari. Në emrin tim dhe të Lëvizjes BESA – urojmë gjithë anëtarët dhe simpatizantët e kësaj partie për zgjedhjen e udhëheqësisë së re, duke i uruar sukses në sfidat e ardhshme”, ka shkruar Kasami.
Zgjedhjen e tij e uroi gjithashtu edhe kreu u Alternativës, Afrim Gashi.
Sipas Gashit, delegtët e ASH-së kanë bërë zgjedhjen më të mirë të mundshme që e zgjodhën atë si kryetar partie. Gashi thotë se ASH është një opozitë konstruktive dhe e respektuar. Ai uron që ASH dhe Alternativa janë de do të jenë mike dhe partnere.
“I nderuari Arben, më vjen mirë që sot Kongresi i Aleancës për Shqiptarët të zgjodhi në detyrën e kryetarit të partisë.
Duke e respektuar vullnetin e delegatëve të ASH-së, shpreh mirënjohjen time të thellë ndaj këtij vendimi, duke gjykuar se ata kanë bërë përzgjedhjen më të mirë për të ardhmen e tyre dhe të qytetarëve tanë.
Aleanca për Shqiptarët edhe sot është një opozitë konstruktive dhe e respektuar, ndërsa duke uruar që flamuri i saj opozitar të jetë vlerë shtesë e demokracisë sonë parlamentare, dëshiroj të theksoj se Aleanca për Shqiptarët ka te AlternAtivA një mik dhe partner, në të cilin mund të mbështetet gjithnjë.
Urime e suksese”, ka uruar Gashi./Zhurnal.mk
