Duhet të ngjiten në kategorinë më të lartë të boksit (nga e majta në të djathtë): trajneri i Universum, Artur Grigorian, Endrit & Ismet Ademi dhe promotori Ismail Özen.
Në vitin 1996, Vitali (sot 54 vjeç) dhe Wladimir Klitschko (49) firmosën kontratën e tyre të parë si profesionistë. Nga klubi i njohur “Universum” në Hamburg, ata nisën rrugën për të pushtuar botën e peshave të rënda dhe lanë pas një epokë të tërë në këtë kategori.
Këtë javë, sërish dy vëllezër të peshave të rënda nënshkruan kontratë me këtë klub tradicional: Ismet (23) dhe Endrit (20) Ademi.
Djemtë nga Ahene kanë zhvilluar nga 40 ndeshje secili në nivel amator dhe së bashku kanë fituar tetë Kampionate të Gjermanisë për klubin BC Helios. Tani, ata ndihen gati për të bërë hapin e madh në boksin profesionist.
Më 1 janar nis bashkëpunimi i tyre me “Universum”. Për promotori Ismail Özen (43), kjo është një ngjarje e madhe:
“Janë dy talente të jashtëzakonshme. Pikërisht ajo që i duhet boksit gjerman. Kanë potencial dhe jemi të bindur se do ta arrijmë qëllimin tonë së bashku.”
Familja e tyre është me prejardhje nga Kosova. Babai, Lavdimi, ishte adhurues i arteve marciale dhe u kishte ndërtuar fëmijëve një mini-gjimnastikë në shtëpi: me thes boksi, shufër për tërheqje dhe pajisje vrapimi. Kur Ismeti ishte vetëm dhjetë vjeç, babai i regjistroi të dy vëllezërit në klubin BC Helios.
“Që nga fillimi ishim të çmendur pas sparring-ut,” tregon vëllai i madh. “Nuk donim të stërviteshim normalisht, vetëm të luftonim. Dhe i kemi mposhtur një e nga një djemtë më të mëdhenj në moshë.”
Si Klitschko-t!
Ismet dhe Endrit Ademi duan të pushtojnë botën e peshave të rënda.
Edhe pse trajnohen dy herë në ditë së bashku, një gjë ka qenë e qartë që në fillim:
“Të luftojmë kundër njëri-tjetrit? Kjo nuk ekziston për ne. As në sparring,” thekson Ismeti.
“E kemi premtuar para prindërve dhe para vetes. Sado para të ofrohen, ne nuk e bëjmë kurrë këtë.”
Njësoj si idhujt e tyre të mëdhenj, vëllezërit Klitschko.
Ismeti dhe Endriti janë të pandashëm edhe jashtë ringut. Deri para gjysmë viti flinin ende në të njëjtën dhomë te prindërit! Tani jetojnë në një banesë së bashku.
“Ne i bëjmë të gjitha së bashku,” thotë Endriti.
Ismeti shton: “Nëse ai fiton, fitoj edhe unë. Nëse ai humbet, humbas edhe unë. Është e njëjta gjë.”
https://www.bild.de/sport/mehr-sport/boxen-universum-ismet-und-endrit-ademi-wollen-die-box-welt-erobern-690c907db035f3184cc83fd4