Ohër, 17 prill – Në Kushtetutën bullgare nuk ka pakicë dhe ajo bazohet në një parim krejtësisht tjetër, në ligjin individual, jo në atë kolektiv. Ne nuk kemi pakicë në vendin tonë, kështu thotë ligji, tha nënkryetarja e Bullgarisë Iliana Jotova, duke folur për kërkesat për njohjen e shoqatave maqedonase në Bullgari, gjatë vizitës së sotme në Ohër.
Në lidhje me faktin se Bullgaria kërkon njohjen e të drejtave të bullgarëve në Maqedoninë e Veriut, ndërsa nga ana tjetër nuk i njeh të drejtat e maqedonasve në Bullgari, për të cilat ka vendime nga gjykata në Strasburg, Jotova, tha se “nuk kemi pakicë në vendin tonë, ndërsa te ju është ndryshe dhe siç e pamë në regjistrimin e fundit, ju jeni një vend shumëkombësh”.
“Unë kam punuar shumë vite në Këshillin e Evropës dhe në BE dhe do t’ju them se kjo që citoni nga Strasburgu është një zgjidhje që ka të bëjë me respektimin e të drejtave të njeriut dhe asnjëherë nuk ka thënë që Bullgaria të njohë pakicën maqedonase. Pra, askush nuk ka kërkuar dhe nuk do të kërkojë që Bullgaria të njohë asnjë pakicë, sepse Kushtetuta bullgare respektohet në Strasburg”, tha Jotova.
Jotova theksoi gjithashtu se Bullgaria do të vazhdojë të punojë për mbrojtjen e të drejtave të qytetarëve bullgarë në vend dhe se Bullgaria nuk do t’i thotë “po” anëtarësimit në BE derisa këto çështje të rregullohen.
E pyetur nëse problemi kryesor për heqjen e vetos bullgare ndaj Maqedonisë së Veriut në BE është përfshirja e bullgarëve në kushtetutën e vendit, Jotova tha se “nuk është vetëm kjo”.
“Nëse e njihni mirë Marrëveshjen e Fqinjësisë së Mirë ndërmjet dy vendeve, do ta dini se brenda pesë viteve të fundit nuk është bërë asgjë për ato çështje. Së pari, kushtet e vendosura për tekste të caktuara në tekstet e shkollave të mesme, të cilat duhet të përcaktohen nga Komisioni Historik midis dy vendeve dhe të futen siç duhet në tekste. Së dyti, ne kërkojmë hapjen e arkivave për rastet e njerëzve që kanë treguar vetëdije bullgare dhe së treti, ajo që është jashtëzakonisht e rëndësishme për mua është përdhosja e monumenteve”, tha Jotova.
Sa i përket anëtarësimit të vendit në BE, Jotova theksoi se bëhet fjalë për përmbushjen e kritereve në rrugën e anëtarësimit, sikurse çdo vend tjetër në atë rrugë.
“Ato janë të shkruara qartë në gjashtë grupimet. Në kapitujt që do të hapen me KE-në dhe Raportet e Progresit të Vendit. Është një procedurë që shkon në një drejtim krejtësisht tjetër, tha Jotova, duke iu referuar mundësisë që Bullgaria të heqë veton për luftën në Ukrainë dhe rrezikun e tejmbushjes edhe në rajon.
Deklaratat e nënkryetares Jotova janë pas hapjes së Qendrës Informative Kulturore “Horizontet Ballkanike”.
Sot në mëngjes, ajo vendosi lule në memorialin e 15 turistëve bullgarë që humbën jetën në një aksident me varkë në liqenin e Ohrit në vitin 2009. E vizitoi edhe Qendrën ditore për fëmijët me autizëm në Spitalin e Ohrit.
