Vazhdon nepotizmi i skajshëm i kuadrove të Aleancës për Shqiptarët në Qeveri. Prej kur ka marrë pushtetin, Aleanca është përfshirë në disa skandale nepotizmi, duke punësuar miq e dhëndurë në institucionet shtetërore.
Në qendër të një skandali të tillë ishte Ministri i Shoqërisë Informatike dhe Administratës, Azir Aliu, i cili kishte punësuar dhëndrin në kabinetin e tij. Ishte ky punësimi i parë në jetë për dhëndrin, pa përvojë pune dhe pa kualifikim.
Por një skandal edhe më i madh u zbulua ditëve të fundit, ndërsa janë përfshirë dy ministrat e tjerë të Aleancës për Shqiptarët, ministri i drejtësisë Krenar Lloga dhe ai i shëndetësisë Fatmir Mexhiti.
Ministri Lloga e ka punësuar mikun e tij, pra vëllain e gruas, në kabinetin e ministrit të shëndetësisë, bashkëpartiakut Fatmir Mexhiti.
Por Lloga nuk është mjaftuar me kaq. Sipas informacioneve, ai po përpiqet që ta punësojë edhe gruan e tij në Klinikën e Stomatologjisë. Punësimi i saj po është në proces pas një konkursi të fundit nga ky institucion shëndetësor.
Skandalet e fundit kanë nxitur pakënaqësi edhe brenda Aleancës për Shqiptarët. Anëtarët e kësaj partie kanë shprehur pakënaqësinë se në vend se të punësohen aktivistët, krerët e Aleancës po përpiqen të rehatojnë familjarët e tyre.
Ndërkohë për gjithë këto skandale po hesht kryetari i Aleancës, Arben Taravari. Ai ishte zotuar se do të japë dorëheqje nëse gjatë qeverisjes së ASH-së punësohen miq e familjarë. Por pas vërtetimit të këtyre skandaleve, Taravari është zhytur në heshtje.
