Pas fejesës së festuar në vjeshtë, princi trashëgimtar i Shqipërisë po përgatitet të kurorëzojë dashurinë me të zgjedhurën e zemrës së tij, në praninë e familjarëve dhe miqve më të afërt. Edhe pse përgatitjet janë ende në vijim, ceremonia do të jetë sipas stilit të tyre – mes traditës dhe diskrecionit.
Fejesa e tyre ishte si një ëndërr. I fshehur mes një pylli me pisha dhe me pamje nga një det turkeze i ndriçuar nga dielli, kompleksi hotelier Kep Merli, i vendosur në Rivierën shqiptare dhe i zgjedhur nga Leka Zogu dhe e fejuara e tij Blerta Celibashi për të festuar dashurinë e tyre të sapolindur, ofronte një skenografi idilike. Përballë të ftuarve, çifti përcillte një ndjesi të këndshme dashurie dhe autenticiteti, sinqeriteti dhe thjeshtësie.
E pranishme në festë ishte edhe princesha Géraldine Zogu, 5 vjeçe, vajza e princit Leka nga martesa e tij e parë me Elia Zaharia. Ajo ndante lumturinë me ta, duke dhënë imazhin qetësues të një familjeje të ribashkuar pas një divorci delikat.
Tre muaj më vonë, princi trashëgimtar i fronit shqiptar dhe e fejuara e tij dëshirojnë të krijojnë të njëjtën atmosferë intimiteti dhe gëzimi edhe për martesën e tyre, ndonëse shumë detaje mbeten ende për t’u finalizuar.
“Më e rëndësishmja për ne është të jemi të rrethuar nga njerëzit tanë të dashur dhe ta ndajmë këtë moment me ta, me sinqeritet dhe thellësi. Ëndërrojmë një ceremoni të mbushur me thjeshtësi dhe elegancë… pa bujë dhe pa pretendime, thjesht një moment autentik dhe prekës”, ka rrëfyer princi.
Për të organizuar dasmën në mënyrën më të mirë të mundshme, çifti i është drejtuar sërish kompanisë Sara Event, e cila ishte angazhuar edhe për fejesën e tyre.
Foto © David Nivière
https://www.pointdevue.fr/royal/couronnes-du-monde/leka-dalbanie-et-blerta-celibashi-a-quelques-semaines-du-bonheur
