Udhëheqësja e opozitës venezuelase, María Corina Machado, deklaroi se ajo dhe kandidati i opozitës Edmundo González janë gati të marrin drejtimin e vendit pas kapjes së presidentit Nicolás Maduro, duke thënë se “ora e lirisë ka ardhur”.
Machado theksoi se ajo dhe González synojnë të udhëheqin “menjëherë” qeverinë tranzitore të Venezuelës.
“Sot jemi të përgatitur ta zbatojmë mandatin tonë dhe të marrim pushtetin”, deklaroi Machado në paraqitjen e saj të parë publike të shtunën.
“Do ta rikthejmë rendin, do t’i lirojmë të burgosurit politikë, do të ndërtojmë një vend të jashtëzakonshëm dhe do t’i kthejmë fëmijët tanë në atdhe.”
Shtetet e Bashkuara e kanë njohur Edmundo Gonzálezin si udhëheqësin legjitim të Venezuelës, pasi ai e mundi Maduro-n me më shumë se dyfishin e votave në zgjedhjet e vitit 2024. González kandidoi në vend të Machado-s, pasi asaj iu ndalua kandidimi nga Gjykata e Lartë e kontrolluar nga regjimi i Maduro-s. Maduro i injoroi rezultatet zgjedhore dhe qëndroi në pushtet.
Presidenti amerikan Donald Trump deklaroi të shtunën se administrata e tij po “merr vendimin” se kush do ta qeverisë Venezuelën pas kapjes së Maduro-s.
“Nuk mund të rrezikojmë që dikush tjetër të marrë drejtimin dhe të vazhdojë aty ku e la ai”, tha Trump për Fox News në një intervistë telefonike.
“Prandaj po e marrim këtë vendim tani. Do të jemi shumë të përfshirë. Ne duam liri për popullin dhe një marrëdhënie të shkëlqyer.”
Megjithatë, Trump nuk e përjashtoi mundësinë e emërimit të zëvendëspresidentes Delcy Rodríguez, e cila sipas Kushtetutës venezuelase merr pushtetin, por pa i dhënë asaj mbështetje të plotë.
“Duhet ta shqyrtojmë. Nuk e di çfarë lloj zgjedhjesh ishin ato”, u shpreh ai.
Ekspertët pajtohen se Machado dhe lëvizja e saj janë më të përgatiturat për marrjen e pushtetit.
“Ata kanë mbështetjen e 70 për qind të venezuelasve”, deklaroi për Fox News Digital Jorge Jraissati, president i Grupit për Përfshirje Ekonomike. “Ata do ta udhëhiqnin këtë periudhë tranzicioni.”
Machado festoi kapjen e Maduro-s të shtunën.
“Ka ardhur koha që sovraniteti popullor dhe kombëtar ta qeverisë vendin tonë. Do ta rikthejmë rendin, do t’i lirojmë të burgosurit politikë, do të ndërtojmë një vend të jashtëzakonshëm dhe do t’i kthejmë fëmijët tanë në shtëpi”, shkroi ajo në një deklaratë.
“Kemi luftuar për vite me radhë, kemi dhënë gjithçka dhe ia ka vlejtur. Ajo që duhej të ndodhte, po ndodh.”
Machado, e cila fitoi Çmimin Nobel për Paqe 2025 për angazhimin e saj politik, falënderoi SHBA-në për përmbushjen e “premtimit për të mbrojtur ligjin”.
Udhëheqësja e opozitës ka qenë një aleate e fortë e presidentit Trump, duke përshëndetur publikisht sekuestrimin e një anijeje që transportonte naftë nga Venezuela, si pjesë e planit për rrëzimin e Maduro-s.
Ajo ia dedikoi Çmimin Nobel për Paqe presidentit Trump pasi u shpall fituese në tetor 2025.
Machado u vlerësua me çmimin për përpjekjet e saj në avancimin e demokracisë “përballë autoritarizmit gjithnjë e më të thellë në Venezuelë”, pavarësisht kërcënimeve serioze ndaj jetës së saj.
Ajo ndodhet në fshehje që nga vera e vitit 2024, kur Maduro shpalli fitoren për mandatin e tij të tretë në zgjedhjet e kontestuara.
Në muajt para arrestimit të Maduro-s, Machado kishte paralajmëruar se lëvizja e saj ishte e gatshme të merrte kontrollin territorial dhe administrativ të Venezuelës.