Kalimi në energjinë e gjelbër dhe investimet në infrastrukturë nuk janë më një opsion, por një investim në të ardhmen e vendit, në pavarësinë energjetike, qëndrueshmërinë dhe konkurrueshmërinë, theksova mes tjerash në Forumin e tetë me radhë të Energjisë në Maqedoni – MEF 2025.
Duke e ditur se prodhimi i energjisë së rinovueshme është shpesh i paparashikueshëm, ky proces është veçanërisht sfidues, dhe për të menaxhuar këto efekte, sistemit i nevojitet stabilitet, fleksibilitet dhe investime intensive.
Deri më tani, MEPSO ka regjistruar mbi 80 aplikime për lidhjen e burimeve të energjisë së rinovueshme në rrjetin e transmetimit, me një kapacitet të përgjithshëm prej 9.000 MW.
Në afat të shkurtër, vlerësohet se sistemi ynë mund të integrojë deri në 1.500 MW energji të rinovueshme. Fleksibiliteti është siguruar përmes 200 MW rezervave sistemore për balancim të përshtatshëm.
Përmes planifikimit të kujdesshëm dhe strategjikisht të saktë, MEPSO menaxhon me sukses dy nga proceset më kritike për të ardhmen energjetike të vendit – nga njëra anë sigurimin e stabilitetit të sistemit elektroenergjetik dhe nga ana tjetër integrimin dinamik të burimeve të energjisë së rinovueshme.
Këto procese paralele janë të ndërlikuara dhe kërkojnë një shkallë të lartë koordinimi, ekspertizë teknike dhe udhëheqje vizionare.
Forumi MEF 2025 bashkon në një vend institucionet qeveritare, ekspertë vendas dhe të huaj të energjisë, përfaqësues të industrisë, sektorit civil dhe organizatave ndërkombëtare – me një qëllim të përbashkët: të përcaktohet një rrugë e qëndrueshme, e drejtë dhe ekologjikisht përgjegjëse për zhvillimin energjetik të Ballkanit Perëndimor.
