Ilir Meta dhe Monika Kryemadhi janë divorcuar zyrtarisht tanimë.
Në seancën në Gjykatën Civile të Tiranës ishte i pranishëm kreu i Partisë së Lirisë, Ilir Meta, i cili ndodhet në burg që prej tetorit 2024, në kuadër të hetimeve të Prokurorisë së Posaçme SPAK.
Meta është shoqëruar nga qelia në burgun 313 drejt Gjykatës Civile me forcat e Policisë së Burgjeve.
Kurse Kryemadhi nuk është paraqitur në seancë, por u përfaqësua nga avokati i saj mbrojtës, Redi Llanaj.
“Sot në datën 11.04.2025, ora 10:30, pranë Gjykatës së Shkallës së Parë të Juridiksionit të Përgjithshëm Tiranë, Dhoma Civile, u zhvillua seanca e pajtimit si dhe seanca gjyqësore me objekt zgjidhje martese me paditës I.M dhe të paditur M.K, ku të pranishëm ishin paditësi dhe avokati i tij. Pala e paditur, e njoftuar nga gjykata me fletëthirrje, nuk u paraqit në seancë, pa asnjë shkak ligjor, duke e lënë gjykimin në mungesë”, thuhet në njoftimin e gjykatës.
“Në përfundim të seancës, gjykata vendosi: Zgjidhjen e martesës midis paditësit I.M dhe të paditurës M.K.”.
Presidenti i Partisë së Lirisë Ilir Meta njoftoi në qershor të vitit të kaluar ndarjen me Monika Kryemadhin.
Lajmi u bë i ditur asokohe gjatë një interviste televizive në Syri TV, teksa vendosi edhe “vulën” e fundit në çarjen mes tij dhe Kryemadhit, duke përmendur se çështja është tashmë përfundimtare.
Meta deklaronte se ndarja e tij me Kryemadhin tashmë ishte duke u ndjekur dhe në rrugë ligjore.
Gjatë intervistës, Meta shprehej se ka lajmëruar dhe fëmijët e tij për vendimin e marrë.
“Znj. Monika Kryemadhi është tashmë ish-bashkëshortja ime dhe sot kam ndjekur edhe rrugën juridike për këtë çështje dhe kam njoftuar edhe djalin tim Besar Ilir Meta”, pohonte Meta.
Arsyet mbi këtë vendim ndërkaq, nuk i përfoli.
