Në Ditën Ndërkombëtare të Punës, zv/kryeministri i parë i Republikës së Maqedonisë së Veriut, Izeti Mexhiti, ka shprehur mirënjohje të thellë për të gjithë punëtorët që me ndershmëri dhe përkushtim kontribuojnë në ndërtimin e një shoqërie më të barabartë dhe më të zhvilluar.
Në mesazhin e tij urues, Mexhiti vlerësoi lartë rolin e punëtorëve nga të gjitha sektorët – nga mësimdhënësit dhe mjekët, te punonjësit e sigurisë dhe bujqit – duke i cilësuar si “forca e palëkundur e progresit tonë”.
Ai rikujtoi përkushtimin e Qeverisë për krijimin e vendeve të reja të punës dhe përmirësimin e kushteve të punëtorëve, duke theksuar rritjen e pagave në sektorët kyç, rritjen e pagës minimale dhe mesatare, si dhe mbështetjen e bujqësisë përmes subvencioneve. Sipas tij, këto janë hapa konkretë drejt një zhvillimi ekonomik më të qëndrueshëm.
“Çdo punëtor meriton më shumë – vlerësim, mbështetje dhe motivim. Politika jonë zhvillimore ka në themel dinjitetin e punës dhe të punëtorit,” deklaroi Mexhiti, duke theksuar angazhimin për të ndërtuar një të ardhme më të drejtë për të gjithë qytetarët.
