Shkup, 6 dhjetor – Për vaksinën HPV ka përqindje relativisht të vogël të vajzave të vaksinuara për shkaqe të ndryshme. Kjo vaksinë është një prej vaksinave më efikase dhe ka për qëllim të ndikojë dhe parandalojë zhvillimin e kancerit në qafën e mitrës, apelon prof.dr. Aleksandra Grozdanova, koordinatore nacionale për imunizim në brifingun e sotëm në lidhje me çështjet rreth furnizimit, ruajtjes dhe qasjes në informacione për vaksinat, në organizim të Institutit të Mediave të Maqedonisë dhe UNICEF-it.
“Kanceri i qafës së mitrës është një prej më të përhapurve te popullata femërore e moshës prej 15 deri 45 vjet, ndërsa është i dyti me radhë, menjëherë pas kancerit të gjirit. Prindërit këtë seriozisht duhet ta kenë si informacion me qëllim që të marrin vendim nëse do t’i vaksinojnë vajzat e tyre ose jo”, tha dr. Grozdanova.
Shtoi se sipas kalendarit për imunizim kjo vaksinë jepet mes nëntë dhe 12 vjet, ndërsa në mënyrë shtesë ato të cilat nuk kanë marrë vaksinë deri në këtë moshë mund ta marrin deri 15 vjet.
Shkaku se pse pikërisht në këtë moshë është e nevojshme që vajzat ta marrin vaksinën, siç tha dr. Grozdanova, është për shkak të asaj se nga aspekti imunologjik është shumë me rëndësi kur do të jepet vaksina, por në mënyrë shtesë, kjo vaksinë është asocuar të merret sa më herët që mundet, gjegjësisht para se vajzat të fillojnë të kryejnë marrëdhënie seksuale.
“Kjo vaksinë e cila për momentin është e kapshme te ne është katërvalente dhe mbron nga katër serotipet më invazive, drejtpërdrejt të lidhura me zhvillimin e kancerit të qafës së mitrës. Ka edhe vaksina të reja me valencë më të madhe dhe pres që gjatë viteve të ardhshme t’i kemi edhe ato”, shtoi ajo.
