Zëvendësdrejtori i Drejtorisë së Doganave, Mustafa Dauti, ka bërë të ditur se në pikën kufitare Bllatë është parandaluar një tentativë për kontrabandimin e mbi 3 mijë gjilpërave për tatuazh, së bashku me pajisje dhe materiale të tjera për tatuazhe.
Sipas Dautit, rasti është zbuluar gjatë kontrollit të një automjeti transportues në hyrje të vendit. Nëpunësit doganorë, gjatë kontrollit të detajuar, kanë zbuluar një sasi të madhe gjilpërash për tatuazh, të cilat drejtuesi i automjetit dyshohet se është përpjekur t’i fusë ilegalisht në vend.
„Në kuadër të kontrolleve të rregullta doganore, në pikën kufitare Bllatë është parandaluar një tentativë për futjen e paligjshme të mbi 3 mijë gjilpërave për tatuazh“, bëri të ditur Dauti.
Përveç gjilpërave, gjatë kontrollit janë zbuluar edhe 60 paketime me gjithsej 7,2 litra bojë për tatuazhe, si dhe 150 copë pomada dhe mjete të tjera ndihmëse për tatuazhe.
Dauti theksoi se kontrollet në pikat kufitare kanë për qëllim parandalimin e kontrabandës dhe respektimin e rregullave për futjen e mallrave në territorin e vendit.
Malli i zbuluar është sekuestruar, ndërsa për rastin do të ndërmerren procedurat përkatëse në përputhje me ligjin.
