Skena muzikore ballkanike dhe dashamirësit e muzikës rome i kanë dhënë lamtumirën një prej zërave më të njohur dhe më të dashur të kësaj muzike.
Dje ka ndërruar jetë këngëtarja e njohur nga Velesi, Xhansever (Xhansever Dalipova), një prej emrave më të mëdhenj të muzikës rome, e cila për dekada me radhë fitoi zemrat e publikut në mbarë rajonin me zërin e saj të fuqishëm, emocionin e thellë dhe interpretimet e veçanta të muzikës rome dhe arabe.
Lajmi për vdekjen e saj ka shkaktuar pikëllim të madh te fansat, kolegët, miqtë dhe të afërmit e saj në Maqedoninë e Veriut, Ballkan, Turqi dhe diasporë.
Në rrjetet sociale janë publikuar mesazhe të shumta lamtumire dhe homazhe për këngëtaren, ndërsa admiruesit e saj kujtojnë zërin dhe këngët që e bënë një figurë të veçantë të muzikës rome.
Në mënyrë emocionale është ndarë nga Xhansever edhe Simeon Atanasov, njerku i mbretëreshës së muzikës rome, Esma Rexhepova.
“Xhani ishte një artiste e madhe dhe një zë i papërsëritshëm i muzikës rome. Me talentin, këngën dhe mënyrën e saj të veçantë të interpretimit, ajo la gjurmë të pashlyeshme në zemrat e shumë brezave. Muzika e saj do të vazhdojë të jetojë, ndërsa kujtimi për të do të mbetet i përjetshëm”, ka shkruar Atanasov.
Xhansever konsiderohej një prej vokalisteve më autentike të skenës ballkanike. Përmes muzikës së saj ajo bashkoi breza dhe kapërceu kufijtë, duke krijuar një trashëgimi që do të mbetet pjesë e historisë së muzikës rome.
Zëri i Xhansever mund të jetë shuar, por këngët e saj do të vazhdojnë të jetojnë në kujtesën e publikut.
