Një grup i oficerëve ushtarakë thonë se e kanë marrë nën kontroll Guinea-Bisaun, shtet i vogël në Afrikën Perëndimore, pas raportimeve se presidenti i vendit, Umaro Sissoco Embalo, është arrestuar.
Pak kohë pasi të shtënat u dëgjuan në kryeqytetin Bisau, burimet qeveritare i thanë televizionit BBC se presidenti Embalo ishte arrestuar.
Oficerët ushtarakë më pas u shfaqën në televizionin shtetëror, duke thënë se e kishin pezulluar procesin zgjedhor dhe do të ishin në krye të vendit deri në një njoftim të ri.
Shteti afrikan ishte në pritje të rezultatit të zgjedhjeve presidenciale të së dielës, në të cilat kandidatit kryesor të opozitës i ishte ndaluar pjesëmarrja.
Publikimi i rezultateve pritej të bëhej të enjten. Embalo dhe rivali i tij më i afërt, Fernando Dias, e kanë shpallur fitoren.
Të mërkurën pasdite, Embalo i tha mediumit “France24” përmes telefonit: “Jam rrëzuar [nga pushteti].”
Dëshmitarët në Bisau thanë se kishin dëgjuar të shtëna më herët, rreth orës 13:00, por nuk ishte menjëherë e qartë se kush ishte i përfshirë në to dhe nëse kishte ndonjë viktimë.
Agjencia e lajmeve AFP raportoi se qindra njerëz në këmbë e me automjete ikën duke kërkuar strehim, pasi i dëgjuan të shtënat.
Më vonë, Gjeneral Denis N’Canha e lexoi deklaratën ku u shpall marrja e pushtetit. Ai tha se oficerët ushtarakë e kanë themeluar “Komandën e Lartë Ushtarake për Rikthimin e Rendit” dhe e kanë mbyllur kufirin. Ai i bëri thirrje popullit që “të mbetet i qetë”.
Përpos presidentit Embalo, thuhet se janë arrestuar edhe stafi ushtarak i tij dhe disa ministra./Nacionale