Shkup, 20 maj – Vlerësoj veçanërisht përpjekjet që Franca po bën për të zhbllokuar procesin e integrimeve evropiane duke mbajtur seancat e para ndërqeveritare me Maqedoninë e Veriut dhe Shqipërinë, gjatë presidencës franceze të Këshillit të BE-së, porositi ministri i Punëve të Jashtme Bujar Osmani.
Këtë e ka bërë të ditur Osmani në profilin e tij në Fejsbuk pas takimit me një delegacion të lartë të Ministrisë së Punëve të Jashtme të Francës, të përbërë nga zëvendësdrejtori i Drejtorisë së BE-së në MPJ të Francës Siril Dikemal, Leonor Gim, këshilltar në Drejtorinë e BE-së, Silven Gioge, zëvendësdrejtor për Evropën dhe Nikola Faj, shef i Misionit për Ballkanin Perëndimor në Drejtorinë për Evropën Kontinentale.
“Fillimi i negociatave për anëtarësim dhe anëtarësimi në BE është investim gjeostrategjik për stabilitet dhe prosperitet për vendet e Ballkanit Perëndimor, por edhe për Evropën, veçanërisht në kontekstin aktual gjeopolitik”, ka shkruar Osmani.
