Një grup anëtarësh të Aleancës për Shqiptarët (ASH) nga nëndega e fshatit Tuhin në Kërçovë kanë dalë publikisht kundër vendimit të kryetarit të partisë Arben Taravari dhe përfaqësuesve të ASH-së në këtë qytet, për të braktisur Koalicionin VLEN.
Në një deklaratë të nënshkruar nga 15 anëtarë të nëndegës, ata distancohen nga ky vendim të cilin e cilësojnë si “të paarsyeshëm dhe të dëmshëm për shqiptarët”.
“Vendimi është marrë pa konsultim të gjerë dhe dëmton interesat shqiptare në rajon,” thuhet në deklaratë. Anëtarët njoftojnë se aktivitetin e tyre politik në të ardhmen do ta zhvillojnë brenda kuadrit të Koalicionit VLEN, si pjesë e një partie të bashkuar.
Deklarata është nënshkruar nga 15 anëtarë të nëndegës, mes tyre Qendrim Sadiki, Beqir Mehmedi, Sadik Aliji, Blenim Suka, Besijon Sulejmani, dhe të tjerë.
