Shkup, 29 prill – Pritet këto ditë së pari Shtabi kryesor koordinues i krizës, e më pas edhe Qeveria të deklarohen rreth rekomandimit të Komisionit për sëmundje ngjitëse për heqjen e të gjitha masave restriktive për përballje me KOVID-19. Në vend ka gjithsej 503 raste aktive, ndërsa numri i personave të diagnostikuar prej fillimit të pandemisë është 309.434.
Për shkak të uljes së numrit të rasteve të reja me KOVID-19, të mërkurën, Komisioni për sëmundje ngjitëse rekomandoi heqjen e të gjitha masave restriktive, përveç mbajtjes së domosdoshme të maskave në institucionet shëndetësore, transportin publik dhe shtëpitë e personave të moshuar.
Komisioni gjithashtu u bëri thirrje qytetarëve t’i respektojnë rekomandimet për mbrojtje dhe higjienë personale, siç janë larja e shpeshtë e duarve, dezinfektimi dhe mbajtja e distancës.
Sipas kompetentëve, vaksinimi edhe më tej mbetet masa më e mirë dhe më efikase për mbrojtje të shëndetit të popullatës.
Nga Komisioni për sëmundje ngjitëse potencojnë se në bazë ditore e ndjekin gjendjen me KOVID-19 dhe nëse ka nevojë do të rekomandohen masa të tjera.
Përndryshe, gjatë ditës së djeshme u regjistruan 124 raste të reja me KOVID-19, nga 1.798 teste të bëra.
Nga rastet e reja, në Shkup janë 67, Manastir 24, Prilep 8, Ohër 5, Berovë 4, Tetovë dhe Kërçovë nga 3, Kumanovë 2, Kavadar, Veles, Gostivar, Strumicë, Koçan, Resnjë, Dellçevë dhe Kratovë nga një.
Dje u regjistruan 114 pacientë të shëruar, ndërkaq nuk pati persona të paraqitur të vdekur.
Deri më tani në vend janë bërë gjithsej 2.015.726 testime për KOVID-19. Numri i përgjithshëm i personave të diagnostikuar me KOVID-19 në vendin tonë prej fillimit të epidemisë është 309.434, numri i pacientëve të shëruar është 299.653, i të vdekurve 9.278. Numri i rasteve aktive është 503.
