Një godinë e një kompanie farmaceutike, e vendosur pranë autostradës Tiranë-Durrës, është sulmuar me breshëri plumbash rreth orës 02:00 të mëngjesit.
Dyshohet se sulmi është kryer nga një automjet në lëvizje, duke qëlluar në fasadën e përparme të ndërtesës. Fatmirësisht, nuk raportohet për persona të lënduar nga të shtënat.
Policia ka nisur hetimet për zbardhjen e ngjarjes dhe ka sekuestruar pamjet e kamerave të sigurisë në zonë për të identifikuar autorët.
Ende nuk dihen motivet e këtij sulmi të armatosur ndaj kompanisë farmaceutike.
Në një njoftim zyrtar, Policia e Tiranës deklaroi: “Rreth orës 08:10, në sallën operative të DVP Tiranë është raportuar se në rrugën dytësore të autostradës ‘Durrës-Tiranë’, gjatë natës, dyshohet se është qëlluar me armë zjarri në drejtim të fasadës së një ndërtese.
Nga të shtënat janë shkaktuar vetëm dëme materiale.
Grupi hetimor, nën drejtimin e Prokurorisë, po punon për identifikimin dhe kapjen e autorit/ëve si dhe për zbardhjen e rrethanave të ngjarjes.”
Hetimet vijojnë për të përcaktuar autorët dhe motivet e këtij sulmi.