Mirjana Pajkoviq, deri së fundmi sekretare shtetërore në Ministrinë për të Drejtat e Njeriut dhe Pakicave të Malit të Zi, ka dhënë dorëheqje pasi në publik u publikuan incizime të saj intime. Pajkoviq pohon se nuk bëhet fjalë për skandal seksual, por për një përplasje politike dhe hakmarrje ndaj një personi të fuqishëm, të cilin ajo e ka denoncuar për kërcënime. Për gjithçka ajo fajëson këshilltarin e presidentit të Malit të Zi dhe ish-shefin e shërbimit sekret, Dejan Vukshiq.
Në rrëfimin e saj për Face.ba, ajo përshkroi atë që ka përjetuar, duke theksuar se siguria e saj është e rrezikuar dhe se ka frikë për jetën e saj.
“Po përpiqen të më detyrojnë të kryej vetëvrasje. Është shumë e vështirë për mua. Ndjej sikur trupi im po më tradhton, por duhet të mbledh guximin dhe të flas publikisht për gjithçka,” – tha Pajkoviq. “Ka net kur kam frikë të fle, sepse nuk e di çfarë do të sjellë mëngjesi i ri. Më shqetësojnë në telefon, më shtojnë në grupe të ndryshme. Institucionet shtetërore janë të pafuqishme. Dikush dëshiron që unë të mos kem as vend, as jetë në Mal të Zi,” pretendon ajo.
Pajkoviq thekson se për të kjo nuk është një skandal seksual, por një mesazh i rrezikshëm që u dërgohet të gjithëve që guxojnë t’u kundërvihen njerëzve të fuqishëm. “Këto gjëra më ndodhën pas konfliktit me një nga organet më të larta shtetërore, me Vukshiqin. Në ato video shihet qartë se vetëm unë jam në to. Nëse pala tjetër do të donte të dëmtohej, do të shihej edhe fytyra e burrit. Kjo është një provë e madhe për policinë dhe prokurorinë,” beson ajo.
“Vukshiqi më kërcënoi me përndjekje dhe se e gjithë Mali i Zi do t’i shihte videot e mia. Fati im i vetëm është se isha mjaft e zgjuar ta incizoja atë bisedë. E dija me çfarë lloj personi kisha të bëja, më kërcënonte disa ditë më parë. E incizova për vetëmbrojtje. Po të mos e kisha atë video, nuk do të kisha asnjë provë për të shpëtuar jetën time,” tha ajo.
