Sigurimi i ekuilibrit ndërmjet rritjes së prodhimit të energjisë nga burimet e rinovueshme, stabilitetit të sistemit, lëvizjeve të çmimeve në tregjet e energjisë dhe sigurimit të rezervave të mjaftueshme në rrjetin e transmetimit, por edhe përballja me rreziqet gjeopolitike dhe integrimi në flukset evropiane të energjisë, janë sfidat më të mëdha me të cilat përballet çdo ditë MEPSO, operatori maqedonas i sistemit të transmetimit të energjisë elektrike.
Në një intervistë ekskluzive për revistën EGE, këto sfida i veçon Prof. Dr. Burim Latifi, drejtor i përgjithshëm i MEPSO-s.
Për fillim, si e vlerësoni vitin 2025 sa i përket funksionimit të MEPSO-s dhe për çfarë do të mbahet mend ai vit?
Viti i kaluar do të mbahet mend si viti në të cilin sistemi ynë elektroenergjetik i transmetimit funksionoi në mënyrë stabile, pavarësisht presionit të shtuar nga rritja e burimeve të rinovueshme dhe zhvillimeve dinamike globale të çmimeve të energjisë elektrike në tregjet rajonale. Fokusi i MEPSO-s është i qartë: siguria e sistemit, modernizimi i rrjetit dhe investimet në infrastrukturën kyçe. Paralelisht, kemi shënuar përparim në realizimin e disa prioriteteve strategjike dhe projekteve kapitale, si dhe kemi intensifikuar përgatitjet për integrimin e mëtejshëm në flukset evropiane të energjisë. E pritëm një vit plot sfida dhe treguam se, me planifikim adekuat, përgjegjësi dhe koordinim, mund t’u përgjigjemi me sukses këtyre sfidave. Tranzicioni po përparon, por stabiliteti i sistemit mbetet prioritet absolut.
Me çfarë sfidash përballeni në punën tuaj?
Sfidat më të mëdha lidhen me ruajtjen e ekuilibrit ndërmjet rritjes së prodhimit të energjisë nga burimet e rinovueshme, stabilitetit të sistemit, lëvizjeve të çmimeve në tregjet e energjisë dhe sigurimit të rezervave të mjaftueshme për rrjetin e transmetimit. Përveç kësaj, këtu janë edhe rreziqet gjeopolitike dhe integrimi me flukset evropiane të energjisë. Është fakt se sistemi po bëhet gjithnjë e më i “gjelbër”, por pa investime në rrjetin e transmetimit, ai bëhet edhe më i paqëndrueshëm. Përballemi me ndryshueshmërinë e prodhimit nga burimet e rinovueshme, nevojën për kapacitete balancuese dhe kërkesat në rritje për fleksibilitet. Ekziston gjithashtu presion nga tregu dhe rregullativa, por edhe nevoja për investime të vazhdueshme në infrastrukturën e rrjetit, në mënyrë që të ruhet niveli i lartë i sigurisë. Prandaj investojmë në digjitalizim, automatizim dhe forcimin e infrastrukturës së transmetimit, gjë që në planin afatgjatë do të rrisë stabilitetin e rrjetit dhe do të ulë kostot operative.
Kohët e fundit ka filluar ndërtimi i interkoneksionit ndërmjet Maqedonisë së Veriut dhe Shqipërisë. Pse ky projekt është shoqëruar me probleme dhe vonesa të shumta?
Projekti për ndërtimin e linjës së interkoneksionit ndërmjet Maqedonisë së Veriut dhe Shqipërisë paraqet një investim kompleks ndërkufitar në infrastrukturë, i cili përfshin koordinim dhe harmonizim teknik, lëshimin e lejeve, shpronësimet, procedurat tenderuese dhe procedurat ndërkombëtare. Ne e gjetëm projektin praktikisht në një gjendje ngecjeje, ndaj iu qasëm një rishikimi të plotë të procesit, identifikuam pikat e dobëta dhe në mënyrë sistematike u morëm me çështjet pronësore-juridike, si dhe me pengesat administrative dhe operative. Sot mund të themi se projekti është zhbllokuar dhe ka hyrë në fazën më të rëndësishme – fazën e ndërtimit. Nga një projekt që për një kohë të gjatë ekzistonte vetëm në letër, ai është shndërruar në një realitet aktiv infrastrukturor.
Pse është i rëndësishëm ky projekt dhe çfarë do t’u sjellë Maqedonisë së Veriut dhe vendeve përreth?
Interkoneksionet nuk janë zgjedhje, por domosdoshmëri. Ky interkoneksion ka një rëndësi të qartë strategjike, jo vetëm për dy vendet, por edhe për të gjithë Evropën Juglindore. Siguria energjetike sot arrihet përmes ndërlidhjes, e jo përmes izolimit. Me këtë projekt praktikisht përmbyllet lidhja energjetike përgjatë Korridorit VIII, që paraqet një hap të rëndësishëm drejt rritjes së sigurisë së furnizimit, rritjes së shkëmbimit ndërkufitar të energjisë elektrike dhe pozicionimit të vendit si një nyje relevante energjetike. Ky projekt ka edhe një dimension të qartë ekonomik. Një investim i një përmase të tillë nënkupton angazhimin e kompanive vendore, fuqisë punëtore, inxhinierisë, logjistikës dhe shërbimeve, që paraqet një nxitje të drejtpërdrejtë për ekonominë lokale. Kjo ka efekte pozitive në rritjen ekonomike, në Prodhimin e Brendshëm Bruto, në punësim, por edhe në parashikueshmërinë dhe sigurinë energjetike. Kur infrastruktura energjetike është e fuqishme, atëherë edhe ekonomia është më e fortë, ndërsa investitorët kanë më shumë besim. Do ta përsëris: ky nuk është vetëm një projekt infrastrukturor – është investim në stabilitet, zhvillim ekonomik dhe të ardhmen e tregut rajonal të energjisë, veçanërisht në kontekstin e rritjes së pjesëmarrjes së burimeve të rinovueshme.
Kur pritet që interkoneksioni të vihet në funksion?
Realizimi i projekteve të këtij lloji zhvillohet në një cikël shumëvjeçar, në përputhje me detyrimet kontraktuale, kompleksitetin teknik dhe koordinimin me operatorët partnerë. Me fillimin e aktiviteteve ndërtimore hyjmë në fazën kyçe. Projekti duhet të përfundojë sipas dinamikës së paraparë, ndërsa afati për realizimin e punimeve është 900 ditë, përkatësisht 30 muaj, në mënyrë që pas përfundimit të ndërtimit dhe testimeve të vihet në funksion si pjesë e rrjetit rajonal të transmetimit. Besojmë në kapacitetin dhe profesionalizmin e kontraktuesit për t’i respektuar afatet e parapara, por njëkohësisht jemi të vetëdijshëm se projekte të tilla kërkojnë koordinim të vazhdueshëm, mbështetje institucionale dhe menaxhim të kujdesshëm në të gjitha fazat. Është e rëndësishme të theksohet se ky është një nga projektet më të rëndësishme elektroenergjetike të dekadës së fundit dhe pjesë e strategjisë më të gjerë të MEPSO-s për zhvillimin e një sistemi elektroenergjetik kompakt, stabil dhe të harmonizuar me standardet evropiane. Qëllimi ynë është i qartë – përfundim në kohë, pa kompromise kur bëhet fjalë për cilësinë!
Deri ku ka arritur projekti i interkoneksionit me Kosovën? Çfarë është planifikuar dhe kur fillon ndërtimi?
Projekti i interkoneksionit me Kosovën është pjesë e strategjisë sonë më të gjerë për zhvillimin e një sistemi elektroenergjetik të integruar rajonal dhe stabil. Aktualisht është në fazën e harmonizimit teknik dhe përgatitjes së dokumentacionit, me fokus në përfundimin e strukturës së investimit dhe përcaktimin e afatit kohor. Projekti përfshin ndërtimin e një linje të re transmetuese 400 kV Tetovë – Prizren, me çka vendoset një lidhje e re e drejtpërdrejtë me sistemin elektroenergjetik të Kosovës dhe njëkohësisht forcohet kapaciteti transmetues i rrjetit në pjesën perëndimore të vendit. Segment kyç është ndërtimi i një nënstacioni të ri 400/110 kV në Tetovë, ndërsa ekziston mundësia edhe për ndërtimin e një nënstacioni të ri 400/110 kV në Oslomej, i cili do të mundësojë integrim më të mirë të kapaciteteve ekzistuese dhe të planifikuara prodhuese, veçanërisht nga burimet e rinovueshme. Sa i përket afatit kohor, presim që pas përmbushjes së parakushteve teknike dhe financiare të kalojmë në realizim, ndërsa ndërtimi do të zhvillohet në përputhje me dinamikën e përcaktuar dhe koordinimin rajonal.
Si qëndrojnë gjërat sa i përket lidhjes së paralajmëruar me Serbinë?
Interkoneksioni me Serbinë është përfunduar që në vitin 2015 dhe aktualisht nuk planifikojmë projekt të ri.
Si përballet Maqedonia e Veriut, në kushtet e krizës energjetike, me sfidat me të cilat përballet bota dhe vendet përreth dhe çfarë ndërmerr MEPSO në këtë drejtim?
Duke u udhëhequr nga fakti se siguria ndërtohet në terren vendor, por sigurohet në nivel rajonal, MEPSO menaxhon në mënyrë aktive sistemin përmes koordinimit operativ, kontrollit të shtuar dhe bashkëpunimit rajonal. Zhvillimet aktuale gjeopolitike, përfshirë luftën në Iran dhe luhatjet e lidhura me çmimet e energjisë, nuk kanë ndikim të drejtpërdrejtë në dinamikën e realizimit të projekteve tona.
Cilat janë planet për këtë vit dhe në cilat projekte do të filloni të punoni?
Këtë vit vazhdojmë me një cikël intensiv investimesh, të orientuar drejt modernizimit të rrjetit të transmetimit, forcimit të kapaciteteve të interkoneksioneve dhe krijimit të një sistemi elektroenergjetik stabil, fleksibil dhe të integruar në nivel rajonal. Fokusi ynë është i qartë në zhvillimin e infrastrukturës që nuk u përgjigjet vetëm nevojave të sotme, por është e përgatitur edhe për sfidat e së ardhmes, veçanërisht në kontekstin e integrimit të burimeve të rinovueshme dhe transformimit digjital të energjetikës. Paralelisht, fillojmë realizimin e një prej projekteve më të rëndësishme: rikonstruksionin dhe ndërtimin e korridorit të linjave të transmetimit Gostivar – Kërçovë – Oslomej – Sopotnicë – Manastir, i cili do të rrisë ndjeshëm sigurinë dhe kapacitetin e rrjetit. Planifikojmë edhe ndërtimin e një nënstacioni të ri në Miletkovë, si pjesë e strategjisë më të gjerë për zhvillimin e rrjetit 400 kV dhe forcimin e kapaciteteve transmetuese. Ky projekt do të mundësojë integrim më të mirë të kapaciteteve të reja prodhuese dhe do të përmirësojë shkëmbimin ndërkufitar të energjisë. Njëkohësisht, investojmë në digjitalizimin e sistemit, zgjidhje moderne për monitorim dhe forcimin e sigurisë kibernetike, me qëllim rritjen e qëndrueshmërisë dhe efikasitetit të sistemit tonë. Theks të veçantë këtë vit i kushtojmë edhe zhvillimit të mëtejshëm të rrjetit 400 kV dhe lidhjeve të reja me sistemet e vendeve fqinje. Këto nuk janë vetëm projekte teknike, por investime në rritjen ekonomike, sigurinë e furnizimit dhe të ardhmen evropiane të energjetikës së Maqedonisë së Veriut.
Sa pjesë të energjisë elektrike Maqedonia e Veriut e importon dhe sa e mbulon nga prodhimi vendor?
Në tremujorin e parë të këtij viti, prodhimi vendor mbulonte 71,2% të energjisë elektrike të përgjithshme të transmetuar nga rrjeti i transmetimit drejt rrjeteve të shpërndarjes dhe konsumatorëve të drejtpërdrejtë në Maqedoninë e Veriut. Kjo është edhe e pritshme, duke pasur parasysh se bëhet fjalë për muajt e dimrit, kur prodhimi nga burimet e rinovueshme, veçanërisht nga centralet diellore, është më i ulët. Vitin e kaluar, prodhimi vendor në energjinë totale të transmetuar nga rrjeti i transmetimit merrte pjesë me 77,2%.
Vitin e kaluar MEPSO vuri nën tension transformatorin e ri 400/110 kV në NS Manastir 2. Cilat projekte të tjera të ngjashme janë realizuar deri tani ose janë planifikuar?
Investimet tona kapitale janë të orientuara drejt modernizimit të plotë dhe forcimit të rrjetit të transmetimit. Vënia nën tension e transformatorit të ri në NS Manastir 2 është pjesë e një programi më të gjerë për forcimin e rrjetit të transmetimit, ndërsa aktualisht janë në realizim edhe projekte të tjera të ngjashme në pika kyçe të transformimit. Projekti në Manastir është një hap i rëndësishëm në forcimin e kapacitetit transmetues dhe stabilitetit të sistemit. Kemi filluar me modernizimin dhe zgjerimin e nënstacioneve për të siguruar kapacitet për integrimin e kapaciteteve të reja prodhuese. Shembull është ndërtimi i një nënstacioni të ri pranë Gjevgjelisë dhe rikonstruksioni i linjave 110 kV, në mënyrë që të mund të lidhen më shumë se 1.000 MW nga burimet e rinovueshme, të cilat aktualisht nuk janë në funksion për shkak të kapacitetit të pamjaftueshëm të rrjetit në atë pjesë të vendit. Shumë i rëndësishëm për ne është edhe projekti i zhvillimit të rrjeteve inteligjente, të cilin e realizojmë me Bankën Evropiane për Rindërtim dhe Zhvillim (BERZH). Po punojmë në modernizimin e sistemeve të menaxhimit dhe monitorimit, përfshirë infrastrukturën informatike-telekomunikuese dhe platformat për shkëmbimin e të dhënave në kohë reale, të cilat janë të domosdoshme për integrimin e suksesshëm në “Market Coupling”. Është në përfundim edhe projekti “Rehabilitation and Control”, gjithashtu me mbështetjen e BERZH-it, përmes të cilit janë rehabilituar një numër i madh i linjave kritike të transmetimit, ndër të cilat edhe linja 110 kV NS Prilep – NS Manastir 1, e cila tashmë është vënë në funksion. Në periudhën e ardhshme fillojmë punimet në korridorin e linjave të transmetimit të përmendur më herët, nga Gostivari deri në Manastir, me mjetet tona, e më pas edhe me forcimin e rrjetit në pjesën juglindore të vendit dhe krijimin e një qendre trajnimi në Ohër, gjithashtu me mbështetjen e BERZH-it. Tranzicioni energjetik po e ripërcakton qasjen investuese të MEPSO-s: nga ndërhyrjet klasike infrastrukturore drejt ndërtimit të një rrjeti fleksibil, inteligjent dhe të lidhur në nivel rajonal. Integrimi i numrit gjithnjë e më të madh të burimeve të rinovueshme luan rol kyç në përcaktimin e prioriteteve të investimeve, sepse kërkon korridore të reja transmetimi, kapacitete më të mëdha të rrjetit dhe zgjidhje të avancuara digjitale për menaxhimin e prodhimit të ndryshueshëm. Nevoja për sisteme moderne, të automatizuara dhe interkoneksione më të fuqishme po e formëson vizionin e ri të zhvillimit. Ky është një rrjet që do të jetë në gjendje të mbështesë në mënyrë të besueshme rritjen e përshpejtuar të burimeve të rinovueshme dhe stabilitetin e sistemit elektroenergjetik në dekadat e ardhshme.
Më 1 shkurt hynë në fuqi Rregullat e reja për prokurimin e energjisë elektrike për mbulimin e humbjeve në rrjetin e transmetimit. Çfarë nënkuptojnë ato për ju?
Me hyrjen në fuqi të këtyre Rregullave kemi bërë një hap të rëndësishëm drejt harmonizimit të plotë me praktikat moderne evropiane të tregut dhe parimet e transparencës, konkurrencës dhe mosdiskriminimit. Në përputhje me detyrimin ligjor, MEPSO i ka miratuar ato, ndërsa janë aprovuar nga Komisioni Rregullator për Energjetikë, Shërbime Ujore dhe Shërbime të Menaxhimit të Mbeturinave Komunale (KRRE), me qëllim sigurimin e një prokurimi transparent dhe të orientuar nga tregu të energjisë për mbulimin e humbjeve në rrjetin e transmetimit. Me këtë fitojmë mundësinë për të optimizuar prokurimin e energjisë për mbulimin e humbjeve në tregun e organizuar, në varësi të lëvizjes së çmimeve, e gjithë kjo me qëllim realizimin e kursimeve më të mëdha.
Vitin e kaluar sistemi maqedonas i transmetimit të energjisë elektrike u përball me rrezikun e kolapsit për shkak të pjesëmarrjes së madhe të centraleve diellore në prodhim. A prisni sfida të ngjashme edhe këtë vit?
Menaxhimi i sistemit elektroenergjetik të transmetimit në kohë reale gjatë dhjetë viteve të fundit është bërë një sfidë gjithnjë e më e madhe për të gjithë operatorët, para së gjithash për shkak të ritmit të shpejtë të integrimit të kapaciteteve të reja prodhuese dhe teknologjive të reja. Ky proces po zhvillohet më shpejt sesa përshtatja e sistemit, gjë që është konfirmuar edhe përmes disa incidenteve në sistemet elektroenergjetike evropiane gjatë pesë viteve të fundit, me të cilat jemi përballur edhe ne. Centralet diellore janë pjesë kyçe e tranzicionit energjetik dhe rritja e tyre është pozitive, por njëkohësisht sjell sfida reale në aspektin e balancimit dhe menaxhimit të sistemit.
Çdo MW i ri është i mirëseardhur, por vetëm nëse sistemi ka kapacitet ta pranojë dhe ta integrojë atë.
Sfidat vazhdojnë të ekzistojnë, por sot jemi më me përvojë dhe më të përgatitur, ndaj në mënyrë të vazhdueshme ndërmarrim masa për përmirësimin e menaxhimit operacional, përmirësimin e rregullimit dhe rritjen e fleksibilitetit të sistemit elektroenergjetik, me qëllim minimizimin e rrezikut nga situata të ngjashme në të ardhmen.
A do të mund të vazhdojë MEPSO t’i çaktivizojë centralet diellore për shkak të stabilitetit të sistemit elektroenergjetik?
Detyra jonë është menaxhimi i sistemit maqedonas të transmetimit të energjisë elektrike dhe, në përputhje me Ligjin për Energjetikë dhe Rregullat e Rrjetit, kemi të drejtë dhe detyrim të ndërmarrim gjithçka që është e nevojshme për ruajtjen e stabilitetit dhe integritetit të tij.
Numri i shtuar i centraleve të tilla sot është një nga sfidat më të rëndësishme strukturore për sistemet elektroenergjetike, por edhe një mundësi e rëndësishme, nëse ato menaxhohen siç duhet?
Nuk është çështja nëse centralet diellore janë të mira apo të këqija, por si, me çfarë ritmi dhe nën cilat kushte integrohen në sistemin elektroenergjetik. Ato janë kyçe për tranzicionin energjetik dhe dekarbonizimin, ndërsa integrimi i tyre duhet të ndjekë zhvillimin e rrjetit të transmetimit të energjisë elektrike, në mënyrë që të shmangen të ashtuquajturat ngarkesa të tepërta në rrjet dhe të zvogëlohet rreziku për stabilitetin e sistemit elektroenergjetik.
Deri ku ka arritur procesi i lidhjes me tregjet e energjisë elektrike të Bashkimit Evropian dhe vendeve përreth dhe cilat janë problemet në këtë rrugë?
Lidhja me tregjet e energjisë elektrike të BE-së dhe vendeve përreth është në proces dhe bëhet fjalë për një proces kompleks, afatgjatë dhe të ndërlikuar, i cili zhvillohet në disa faza. Kjo nuk është një aktivitet që varet nga një institucion i vetëm, por nga gatishmëria e përgjithshme teknike, rregullatore dhe e tregut e të gjitha vendeve të përfshira në këtë proces. Po e realizojmë në koordinim me Kosovën dhe Shqipërinë, si pjesë e përgatitjeve për bashkimin me tregun e organizuar të Greqisë, e më vonë edhe me tregun më të gjerë evropian. Aktivitetet zhvillohen në përputhje me planin e dakorduar të veprimit dhe presim që lidhja të përfundojë deri më 1 janar 2029.
Para dy vitesh, faqja juaj e internetit dhe serverët u bënë objektiv i sulmeve hakerike, ndërsa rrjeti energjetik nuk u rrezikua. Çfarë masash keni ndërmarrë pas kësaj dhe a ekziston ende rreziku nga sulme të tilla dhe nga vijnë ato?
Gjatë vitit 2024, ashtu si shumë institucione dhe kompani të tjera në Evropë dhe më gjerë, MEPSO u ekspozua ndaj sulmeve kibernetike të drejtuara ndaj shërbimeve tona publike të IT-së. Këto përpjekje u zbuluan në kohë dhe u trajtuan me sukses, pa asnjë ndikim në funksionimin e sistemit të transmetimit të energjisë elektrike dhe pa cenuar sigurinë dhe stabilitetin e tij. Pas këtyre ngjarjeve, kemi forcuar më tej kapacitetet për sigurinë kibernetike. Masat janë të orientuara drejt përmirësimit të mbrojtjes, përmirësimit të mekanizmave për zbulimin e hershëm të kërcënimeve dhe forcimit të kapaciteteve për reagim të shpejtë dhe efikas. Paralelisht, në mënyrë të vazhdueshme i harmonizojmë proceset tona me standardet e njohura ndërkombëtarisht dhe rregullativat evropiane, në mënyrë që të sigurojmë një nivel të lartë të rezistencës së sistemit dhe besimit në infrastrukturën kritike energjetike. Kërcënimet kibernetike janë një sfidë globale me të cilën përballen të gjithë operatorët e infrastrukturës kritike. Në këtë drejtim, prioriteti ynë është funksionimi i pandërprerë, i sigurt dhe stabil i sistemit të transmetimit të energjisë elektrike në të gjitha rrethanat. Sa i përket origjinës së aktiviteteve të tilla, bëhet fjalë për një fenomen kompleks dhe globalisht të përhapur, i cili shpesh vjen nga lokacione të ndryshme gjeografike dhe karakterizohet nga një shkallë e lartë anonimiteti. Për këtë arsye, identifikimi i saktë i tyre është kompleks dhe realizohet në koordinim me institucionet kompetente kombëtare dhe ndërkombëtare.
Si e vlerësoni bashkëpunimin tuaj me kolegët nga Kroacia, a punoni në projekte të përbashkëta dhe çfarë planifikohet konkretisht?
Bashkëpunimin me kolegët nga Kroacia e vlerësojmë si stabil, profesional dhe konstruktiv, veçanërisht duke pasur parasysh se të dy vendet dhe operatorët tanë të sistemeve të transmetimit të energjisë elektrike përballen me sfida të ngjashme në kuadër të kontekstit rajonal dhe evropian të energjetikës. Në mënyrë të vazhdueshme realizojmë shkëmbim të përvojave dhe praktikave të mira, veçanërisht në pjesën e menaxhimit operacional të sistemit, integrimit të burimeve të rinovueshme dhe digjitalizimit të proceseve. Fokus të veçantë i kushtojmë sigurisë kibernetike dhe sistemeve IT, ku shkëmbimi i njohurive dhe përvojave me kompanitë dhe institucionet kroate kontribuon në përmirësimin e kapaciteteve të brendshme, përfshirë aktivitetet që lidhen me krijimin dhe zhvillimin e qendrave të avancuara për monitorimin dhe reagimin ndaj kërcënimeve kibernetike. Përveç kësaj, bashkëpunimi realizohet edhe në kuadër të iniciativave rajonale dhe evropiane, me fokus në forcimin e stabilitetit dhe sigurisë së sistemeve elektroenergjetike dhe integrimin e tyre të mëtejshëm në tregun evropian. Në periudhën e ardhshme presim që bashkëpunimi të thellohet më tej përmes aktiviteteve dhe projekteve konkrete me interes strategjik.
Përkthyer dhe përshtatur në shqip nga Gazeta Max, versioni origjinal në vazhdim: https://ege.hr/media/ege/casopis/2026/2/18.pdf?fbclid=IwY2xjawT47tBwZG9mAWV4dG4DYWVtAjEwAGJyaWQRMTI2S05FU3lOc1dZWVVKSHZzcnRjBmFwcF9pZBAyMjIwMzkxNzg4MjAwODkyAAEeAD0q8tbNWTWOtYa37huMIRYUveD-SU6opVkpWxBTEdR9YQVraB6_qwrFEsM_aem_JCkZKBdPVtToErSx4xjHhw
