Shtetet e Bashkuara i kanë vendosur kufizime të rrepta delegacionit iranian që po merr pjesë në Asamblenë e Përgjithshme të OKB-së në Nju-Jork, duke ia kufizuar lëvizjen dhe duke ia ndaluar qasjen në dyqane të shitjes me shumicë dhe në produkte luksoze.
Tommy Pigott, zv.zëdhënës i Departamentit të Shtetit, tha në një deklaratë se me këtë masë synohet “maksimizimi i presionit” ndaj udhëheqjes klerike të Iranit, duke e akuzuar atë se po i lejon autoritetet që të gëzojnë shoping luksoz jashtë vendit, përderisa iranianët e rëndomtë ballafaqohen me “varfëri, infrastrukturë që po dështon si dhe mungesë të ujit dhe rrymës”, raporton agjencia e lajmeve “Reuters”.
Udhëheqësit botërorë mblidhen në Nju-Jork çdo shtator për disa ditë, ku mbajnë fjalim në Asamblenë e Përgjithshme të OKB-së, e cila të martën e nis sesionin e 80-të vjetor.
Ekonomia është sfida kryesore për klerikët iranianë në pushtet, të cilët kanë frikë nga ringjallja e protestave që kanë shpërthyer që nga viti 2017 nga komunitetet me të ardhura të ulëta e të mesme, të zemëruara me shtimin e varfërisë për shkak të sanksioneve, keqmenaxhimit dhe korrupsionit shtetëror.
Pigott tha se sekretari i Shtetit i ShBA-së, Marco Rubio, ka dhënë urdhër që delegacionit iranin t’i kufizohet lëvizja vetëm nëpër rrugën mes hotelit dhe selisë qendrore të OKB-së dhe vetëm për punë zyrtare.
Ministria e Jashtme e Iranit nuk i komentoi kufizimet e Departamentit të Shtetit ndaj delegacionit të saj.
Selia qendrore e OKB-së ndodhet në qendër të Manhattan-it. Para kufizimeve të reja, pjesëtarëve të delegacionit iranian u lejohej udhëtimi mes OKB-së, misionit iranian në këtë organizatë, rezidencës së ambasadorit iranian në OKB dhe Aeroportit Ndërkombëtar “John F. Kennedy”.
