Kimi Antonelli ka hyrë në histori të Formula 1, duke u bërë kampioni më i ri i botës në këtë sport. Piloti italian i Mercedesit e siguroi titullin në Çmimin e Madh të Meksikës, ku përfundoi në vendin e tretë, pas Max Verstappenit dhe Lewis Hamiltonit.
Në moshën 20-vjeçare e 68-ditëshe, Antonelli theu rekordin e mëparshëm të Sebastian Vettel, duke u bërë kampioni më i ri në historinë e Formula 1, me më shumë se tre vjet diferencë.
Njëkohësisht, ai i dha fund pritjes 73-vjeçare të Italisë për një kampion bote në Formula 1. I fundit që e kishte arritur këtë sukses ishte Alberto Ascari, në vitin 1953.
Gara në Meksikë ishte emocionuese dhe me shumë të papritura, duke përfshirë dy ndërhyrje të makinës së sigurisë dhe një ndërprerje me flamur të kuq pas një aksidenti të rëndë të Valtteri Bottas.
Max Verstappen triumfoi për herë të gjashtë në Meksikë, duke lënë pas Lewis Hamiltonin me vetëm 0.799 sekonda, ndërsa Antonelli e përfundoi garën 3.207 sekonda pas fituesit.
Pas kalimit të vijës së finishit, italiani nuk arriti t’i përmbajë emocionet.
“Faleminderit shumë, ia dolëm”, deklaroi ai përmes radios së ekipit, ndërsa më vonë shtoi:
“Jam shumë mirënjohës për këtë moment dhe është një moment që do ta jetoj përgjithmonë. Jam pa fjalë, thjesht përpiqem të përpunoj atë që ka ndodhur.”
Ai falënderoi familjen dhe Mercedesin për mbështetjen gjatë një sezoni që e cilësoi të jashtëzakonshëm.
Në podiumin e Meksikës, Antonelli ndau emocionet me dy emra të mëdhenj të këtij sporti, Verstappenin dhe Hamiltonin, të cilët së bashku kanë fituar 11 tituj botërorë.
Ky sukses shënon fillimin e një kapitulli të ri për Formula 1 dhe për automobilizmin italian, me Antonellin që tashmë ka siguruar vendin e tij në historinë e këtij sporti.
Burimi: botasot.info
