Shkup, 13 tetor – Ministria e Transportit dhe Lidhjeve shpalli thirrje publike për rikonstruimin e 14 rrugëve në shtatë komuna, në suaza të projektit për “Lidhshmëri të rrugëve lokale në komuna”.
“Për komunën e Kavadarit thirrja publike ka të bëjë me rindërtimin e katër rrugëve, “Maksim Gorki”, “Sloga”, “Velko Vllahoviq”, “Dimkata Angelot Gabarot”. Për komunën Gradsko, thirrja publike ka të bëjë me rindërtimin e unazës së Gradskos, në komunën e Rosomanit është shpallur thirrje për rindërtimin e rrugës “Goce Dellçev”, ndërsa në komunën e Bosilovës për rrugën në “Ilovica”, dy rrugë në Shtuka dhe një rrugë lokale nga Ednokuçeva deri në rrugën magjistrale A4″, informojnë nga Ministria e Transportit dhe Lidhjeve.
Është shpallur thirrje publike edhe për komunën e Strugës për rindërtimin e rrugës lokale në fshatin Moroishtë, për komunën e Dibrës për rindërtimin e rrugës “Mrezhen Venec” dhe rrugës “Eqerim Zengo” dhe për komunën e Vevçanit për rindërtimin e rrugës nga Shtëpia Shëndetësore deri në Shopev Most .
Siç njoftojnë nga Ministria, mjetet për rikonstruimin e rrugëve konkrete janë siguruar nga Qeveria e Republikës së Maqedonisë së Veriut përmes projektit për përmirësimin e rrugëve lokale e cila është në vlerë të përgjithshme prej 70 milionë euro. Qëllimi është përmirësimi i jetesës urbane në suaza të komunave për shkak të zhvillimit ekonomik lokal dhe përmirësimit të jetës së qytetarëve.
Në suaza të këtij projekti, deri tani janë përfshirë 50 komuna me rreth 110 rrugë, Ministria e Transportit dhe Lidhjeve, thonë prej atje, vazhdimisht punon në realizimin e këtij projekti në të gjitha komunat në Republikën e Maqedonisë së Veriut. Njëherit dërgojmë edhe apel te të gjitha komunat që nuk kanë aplikuar deri më tani, të dorëzojnë projekte të gatshme për shkak të shfrytëzimit në kohë të mjeteve të parashikuara me këtë projekt.
