“Katër vite punë, përkushtim dhe përgjegjësi” – me këto fjalë e nisi fjalimin e tij Sotir Lukrovski, duke e përmbledhur periudhën e kaluar të qeverisjes lokale dhe duke u ndalur në rezultatet konkrete që janë arritur nëpër komuna në gjithë vendin.
Ai theksoi se sot, më shumë se kurrë, mund të dëgjohen vetë kryetarët e komunave, të cilët tregojnë qartë se çfarë kanë trashëguar, me çfarë sfidash janë përballur dhe si kanë arritur të ngrihen mbi to, duke i vendosur komunat mbi baza të shëndosha dhe të qëndrueshme.
“Puna dhe përkushtimi nuk do të ndalen këtu. Ky është vetëm fillimi i një rruge të gjatë, sepse transformimi i Maqedonisë vazhdon – nga çdo lagje e çdo komunë, deri në secilin sektor,” theksoi Lukrovski.
Ai shtoi se prioritet mbetet zhvillimi i barabartë, kujdesi për qytetarët dhe modernizimi i shërbimeve publike, ndërsa e ardhmja do të jetë edhe më premtuese për qytetin e Karposhit. “Vijnë kohë të bukura për Karposhin. Vitet e ardhshme do të jenë vite të zhvillimit, investimeve të reja dhe përmirësimit të cilësisë së jetës së banorëve,” tha Lukrovski.
Me këtë mesazh, ai nënvizoi se transformimi i komunave është pjesë e një vizioni të gjerë për Maqedoninë, ku çdo qytetar duhet ta ndjejë ndryshimin në jetën e përditshme, duke filluar nga rrugët dhe infrastruktura, deri tek arsimi, shëndetësia dhe mjedisi jetësor.
Lukrovski përfundoi me një premtim të qartë: angazhimi, përgjegjësia dhe puna e pandalshme do të jenë garanci që katër vitet e ardhshme të sjellin edhe më shumë zhvillim, standard më të mirë dhe një të ardhme më të sigurt për të gjithë.
