Ministria e Jashtme e Shqipërisë ka reaguar pas deklaratës së presidentit ukrainas Volodymyr Zelensky në Beograd, ku ai konfirmoi se Ukraina nuk e njeh dhe nuk ka ndryshuar qëndrimin e saj ndaj pavarësisë së Kosovës.
Gjatë vizitës në Serbi dhe takimit me presidentin Aleksandër Vuçiç, Zelensky deklaroi se politika e Ukrainës për Kosovën mbetet e pandryshuar.
Pas kësaj deklarate, Ministria për Evropën dhe Punët e Jashtme e Shqipërisë theksoi se çështja e Kosovës nuk mund të vendoset në të njëjtin plan me luftën në Ukrainë.
Në reagimin e saj, Tirana nënvizon se mbështet fuqimisht sovranitetin, pavarësinë dhe integritetin territorial të Ukrainës, por njëkohësisht qëndron fort në mbështetje të sovranitetit dhe pavarësisë së Kosovës.
“Çdo përpjekje për të vendosur një paralele ose për të krijuar një ekuacion midis Kosovës dhe çdo situate tjetër ndërkombëtare është e gabuar, oportuniste dhe thellësisht çorientuese”, thuhet në reagimin e Ministrisë.
Sipas Tiranës, rasti i Kosovës ka bazat e veta historike, politike dhe juridike. Ministria sjell në vëmendje edhe opinionin e Gjykatës Ndërkombëtare të Drejtësisë, e cila në vitin 2010 vlerësoi se shpallja e pavarësisë së Kosovës nuk kishte shkelur të drejtën ndërkombëtare.
Ndërkohë, Shqipëria e cilëson agresionin rus ndaj Ukrainës si një çështje krejtësisht të ndryshme, duke e konsideruar atë shkelje të Kartës së OKB-së dhe të së drejtës ndërkombëtare.
Tirana thekson se një Ballkan Perëndimor paqësor, i qëndrueshëm dhe evropian kërkon pranimin e realitetit dhe të pakthyeshmërisë së pavarësisë së Kosovës.
Në reagim thuhet gjithashtu se Serbia dhe Kosova i përkasin një të ardhmeje të përbashkët evropiane dhe se normalizimi i marrëdhënieve mes tyre duhet të çojë përfundimisht drejt njohjes së ndërsjellë.
Sipas Ministrisë së Jashtme, një zhvillim i tillë do të ndihmonte në mbylljen e një prej kapitujve më të dhimbshëm të historisë së rajonit dhe do të hapte rrugën për pajtim, fqinjësi të mirë dhe paqe të qëndrueshme.Sa i përket vizitës së Zelenskyt në Serbi, Tirana e vlerëson dialogun si një zhvillim pozitiv dhe shprehet se çdo hap që ndihmon Serbinë të largohet nga ndikimi rus dhe të afrohet me Evropën është në interes të rajonit.
Por Shqipëria përsërit se Ballkani Perëndimor duhet të ecë përpara dhe se çështjet e Kosovës dhe Ukrainës nuk mund të barazohen.
