Shkup, 1 janar – Delegacioni qeveritar i kryesuar nga kryeministri Dimitar Kovaçevski, ministrja e Punës dhe Politikës Sociale Jovana Trençevska dhe zëvendësministri i Transportit dhe Lidhjeve Bekim Rexhepi vendosën lule në prehjen e përjetshme të presidentit Kiro Gligorov në varrezat e qytetit në Butel.
Sot bëhen 11 vjet nga vdekja e presidentit të parë të Republikës së Maqedonisë së Veriut, Kiro Gligorov, i cili më 8 shtator 1991, pas referendumit të suksesshëm shpalli pavarësinë e vendit.
Në një komunikatë për media, Qeveria rikujton se presidenti Gligorov ishte presidenti i parë maqedonas që foli në gjuhën maqedonase në foltoren e Kombeve të Bashkuara më 8 prill 1993, kur Republika e Maqedonisë u bë anëtarja e 181-të e KB-së.
Një delegacion i LSDM-së i përfaqësuar nga sekretari i përgjithshëm Mile Zeçeviq, nënkryetari Stefan Bogoev dhe Gjuner Ismail gjithashtu vendosën lule në vendprehjen e përjetshme të Gligorovit.
Gligorov vdiq më 1 janar 2012 në Shkup në shtëpinë e tij në moshën 94 vjeçare.
Ai ishte zyrtari më i vjetër politik maqedonas. Më 17 nëntor 1999, kur i mbaroi mandati i dytë presidencial, ai ishte 82 vjeç dhe në vitin 2000, Libri i Rekordeve Gines e regjistroi Gligorovin si presidentin më të vjetër të një vendi në botë.
