Deri në fund të qershorit do të ketë aktvendim për rastin në të cilin po hetohet kryetari i Strugës, Ramiz Merko, për blerjen e kontestuar të automjetit luksoz Audi A6 me vlerë prej 67 mijë euro dhe tre vetura të tjera me vlerë prej 114 mijë euro në kohën kur komuna e Strugës kishte llogari të bllokuar bankare, njoftoi sot gjykatësi Jordan Jovanov. Ai tha se provat e paraqitura deri më tani janë të mjaftueshme dhe se propozimet e mbetura do të refuzohen.
“Në seancën e sotme përfunduam provat verbale që Gjykata i pranoi. U prezantuan edhe provat materiale dhe tani mbetet të shikohet i gjithë dokumentacioni dhe t’i jepet mundësia mbrojtjes dhe prokurorisë që të përgatisin fjalën përfundimtare dhe ta përmbyllin në seancën e ardhshme. Kjo do të thotë në qershor dhe ramë dakord që atëherë i akuzuari të paraqesë mbrojtjen e tij dhe nëse do të ketë nevojë për afat të shkurtër për fjalët përmbyllëse, do të japim, por gjatë qershorit do të ketë epilog”, deklaroi Jordan Jovanov-gjykatës.
Gjykimi sot vazhdoi me dëshmitarët e mbrojtjes, mes të cilëve edhe Erhana Bauta, mbesa e Ramiz Merkos, e cili është e punësuar në komunën e Strugës dhe që në kohën e blerjes së automjeteve ka qenë nënkryetare e Komisionit të prokurimeve publike në komunë. Ajo tha se duke qenë se komuna kishte mbetur pa vetura, është bërë prokurimi publik i veturave të reja, për të cilin është marrë vendim edhe nga Këshilli i komunës së Strugës dhe se e gjithë procedura ka qenë transparente dhe është kryer në përputhje me ligjin.
“Pohoj se është përzgjedhur oferta më e favorshme dhe janë blerë 4 automjete, tre automjete për pasagjerë Shkoda dhe një Audi”, tha Erhana Bauta- dëshmitare e mbrojtjes dhe e punësuar në komunën e Strugës.
Në pyetjen e prokurorit publik mbi bazë të të cilave kritere është përcaktuar që këto vetura, veçanërisht Audi A6, të blihen, kryetari i Komisionit për prokurime publike, Alija Ajdinoski, deklaroi:
“Nuk më kujtohet saktë sepse shërbimet komunale merren me kriteret kurse plani vjetor dhe paratë e siguruara kanë kaluar edhe në seancë të Këshillit”, u shpreh Alija Ajdinoski- dëshmitar dhe kryetar i Komisionit për Prokurime Publike.
Revizioni Shtetëror në vitin 2019 ka bërë revizion në punën e komunës për vitin 2018, kur është kryer prokurimi i automjeteve. Liljana Stojanova nga Enti Shtetëror i Revizionit, në cilësinë e dëshmitares, tha se duhet të merret parasysh pjesa e raportit që flet për bllokimin e llogarisë së komunës dhe çfarë kompetenca nuk duhet të merren në rast të tillë.
Avokati i Merkos, Igor Petkovski, tha se vazhdon të vërtetohet teza e mbrojtjes se në këtë rast nuk ka asnjë provë që tregon për ndonjë parregullsi në prokurimin e makinës Audio-s. Sot ka vazhduar gjykimi për vendosjen e tabelës në hyrje të objektit të komunës së Strugës. Ndaj Merkos janë aktualisht 9 raste gjyqësore aktive kurse dokumenti i udhëtimit i është konfiskuar, si masë për shkak të rrezikut të arratisjes.