Shkup, 30 shtator – Zëvendëskryetarja e Qeverisë e ngarkuar për Politika të Qeverisjes së Mirë, Sllavica Gërkovska, sot pati takim me ambasadoren e sapoemëruar të Mbretërisë së Suedisë në Republikën e Maqedonisë së Veriut, Ami Larson Xhein.
Zëvendëskryeministrja Gërkovska i dëshiroi ambasadores Larson Xheinit mirëseardhje dhe kryerjen me sukses të misionit. Gërkovska shprehu bindje se në periudhën e ardhshme do të thellohet bashkëpunimi i mirë dhe intensiv ndërmjet Republikës së Maqedonisë së Veriut dhe Suedisë, kumtoi pres shërbimi qeveritar.
“Mbretëria e Suedisë do të kryesojë me Këshillin e Bashkimit Evropian në gjysmën e parë të vitit 2023 dhe jam e bindur se Maqedonia e Veriut do të ketë një mik dhe mbështetës të fortë që procesi ynë integrues të vazhdojë me ritëm të pandërprerë. Hapja e negociatave inkuadruese me Bashkimin Evropian është me rëndësi kyçe për përshpejtimin e agjendës së reformave në vend”, theksoi zëvendëskryeministrja Gërkovska.
Ambasadorja Larson Xheini tha se të dyja vendet kanë bashkëpunim dypalësh në shumë fusha me interes të përbashkët, siç janë demokracia, barazia gjinore dhe mjedisi jetësor. Ajo theksoi se së fundmi është miratuar Strategjia e Suedisë për Ballkanin Perëndimor dhe Turqinë, në kuadër të së cilës për vendin tonë do të ndahen gjashtë milionë euro.
Të dy bashkëbisedueset ranë dakord se është mirë që bashkëpunimi i ndërsjellë të thellohet në pjesën e përmirësimit të transparencës së institucioneve, por edhe për bashkëpunim më të ngushtë me të rinjtë që janë kyç për zhvillimin e shtetit, qëndron në kumtesën e pres shërbimit qeveritar.
