Kryeministri sllovak, Robert Fico uroi të hënën udhëheqësin e ri të Hungarisë, Peter Magyar pas zgjedhjeve të mbajtura të dielën. Fico në reagimin e tij theksoi se pret një bashkëpunim intensive. Ai gjithashtu shprehu mirënjohje për kryeministrin në largim Viktor Orban.
Fico, një aleat kyç që mbështeti Orbanin para fillimit të votimit, tha se Sllovakia ishte gati për lidhje të ngushta dhe veprimi i përbashkët në mbrojtjen e interesave energjetike mbeti një qëllim.
“Me respekt të plotë, e marr parasysh vendimin e qytetarëve të Hungarisë… dhe jam i gatshëm për bashkëpunim intensiv me kryeministrin e ri hungarez, të cilin e përgëzoj për rezultatin e zgjedhjeve”, tha Fico në një deklaratë.
Nën drejtimin e Ficos, i cili u rikthye në detyrë në vitin 2023, Sllovakia ka qenë një aleat i ngushtë i Hungarisë, me të dy fqinjët që mbajnë lidhje të ngrohta me Moskën, duke kundërshtuar sanksionet e Bashkimit Evropian dhe duke vazhduar blerjet e naftës dhe gazit rus.
Të dy kanë kërkuar të rivendosin rrjedhën e naftës ruse përmes tubacionit Druzhba, i cili ka qenë jashtë funksionit që nga fundi i janarit pas dëmeve në Ukrainë që Kievi tha se u shkaktuan nga një sulm rus.
Fico tha se besonte që Sllovakia, Hungaria dhe Evropa Qendrore ishin ende të interesuara për rifillimin e funksionimit të saj, duke shtuar se veprimi i përbashkët me Hungarinë në mbrojtjen e interesave energjetike mbeti i pandryshuar si një qëllim i qeverisë.
Javën e kaluar, Presidenti ukrainas Volodymyr Zelenskyy tha se riparimet e tubacionit do të përfundojnë në pranverë. Fico dhe Orban kanë pasur marrëdhënie të tensionuara me Zelenskyy pavarësisht pushtimit të Ukrainës nga Rusia në vitin 2022.
Në një deklaratë të veçantë në Facebook, Fico tha se marrëdhëniet sllovako-hungareze nuk kanë qenë kurrë në një nivel kaq të lartë dhe vlerësoi Orbanin për bashkëpunimin shembullor dhe mbrojtjen e sovranitetit dhe interesave kombëtare.
