Izet Mexhiti nuk konfirmon akoma nëse do të përballet me Bujar Osmanin për pozitën e të parit të Komunës së Çairit.
Edhe pse zërat flasin për një kandidaturë të mundshme të Mexhitit, ai thotë se emrat e kandidatëve të VLEN do të konfirmohen gjatë periudhës së ardhshme.
“Po bëjmë analizat e fundit brenda VLEN-it dhe besoj që ditët në vijim, javën e ardhshme do të shpalosim të gjitha kandidaturat brenda VLEN-it, përveç Strugës që e kemi shpalos” , tha Izet Mexhiti, VLEN.
Nga VLEN thonë se do të kenë kandidat edhe për Qytetin e Shkupit, edhe pse kandidat do të ketë edhe partneri i koalicionit qeveritar Orce Gjoergjievski. Nga koalicioni në pushtet nuk e kanë mohuar bashkëpunimin në zgjedhjet e tetorit.
“Do të kemi kandidat edhe për Qytetin e Shkupit, se kush do të jetë edhe në Çair, edhe në Shkup, edhe në të gjitha komunat”, u shpreh Izet Mexhiti, VLEN.
Sipas Kodit zgjedhor, partitë politike kanë afat deri 30 ditë para ditës së zgjedhjeve që të dorëzojnë në KSHZ emrat e kandidatëve të tyre. Por zakonisht këtë e bëjnë shumë më herët, duke filluar praktikisht më herët edhe fushatën zgjedhore, para fillimit zyrtar të saj.
