Në dhjetor 2023, emigranti shqiptar, Leonard Farruku, 27 vjeç, u gjet i vdekur brenda anijes Bibby Stockholm, e përdorur si qendër strehimi për azilkërkues në Portin Portland, Dorset.
Hetimi i hapur mbi vdekjen e tij ka zbuluar detaje shqetësuese rreth mënyrës sesi ai përfundoi në këtë anije dhe trajtimit që mori.
Sipas raportimeve nga hetimi i zhvilluar në Bournemouth, shkaku i vdekjes ishte kompresimi në qafë, një formë vetëvrasjeje e dyshuar. Farruku u gjet i pavetëdijshëm në një kabinë dushi më 12 dhjetor 2023 dhe nuk mundi të shpëtohej.
Motrat e tij, Marsida Keci dhe Jola Dushku, thanë se Leonardi kishte probleme serioze me shëndetin mendor, sidomos pas humbjes së prindërve, dhe se nuk kuptojnë si ai u lejua të transferohej në Bibby Stockholm. Ai më parë qëndronte në Hotelin Esplanade në Paignton, Devon, ku kishte demonstruar sjellje agresive dhe të paqëndrueshme që nga korriku i vitit 2023.
Ashley Rangasamy, një përfaqësues i Torbay Community Trust, i cili mbështeste Leonardin dhe mbi 100 azilkërkues të tjerë në hotel, dëshmoi se kishte parë Farrukun në gjendje agresive dhe kishte ngritur shqetësime të përsëritura për gjendjen e tij psikologjike.
Një vullnetar që punonte me Leonardin kishte paralajmëruar se ai ishte “shumë i shqetësuar” për transferimin në Bibby Stockholm. Ai tha se i kishin thënë se ‘gjendja e tij shpirtërore kishte ndryshuar dhe se ai ishte shumë i vendosur të mos shkonte dhe ishte shumë i shqetësuar për këtë ide’. Sipas Rangasamy, Farrukut iu tha se do të dërgohej në Swindon, jo në Bibby, por përfundimisht u fut në makinë dhe u transferua në anijen e shumëpërfolur.
“Ata e mashtruan,” tha Rangasamy gjatë seancës. Ai shpjegoi gjithashtu se përpiqej të kontaktonte menaxhmentin e Bibby Stockholm për të ngritur shqetësimet për gjendjen e Farrukut, por nuk arriti të gjente asnjë kontakt. Edhe përpjekja për të përçuar mesazhin përmes banorëve të tjerë të anijes rezultoi pa sukses – njëri prej tyre “thjesht u pushua nga puna”.
Ai pranoi se duhej të kishte vepruar më shumë, por shtoi: “Thjesht nuk dija çfarë të bëja.”
Rasti i Leonard Farrukut ka ngritur sërish pyetje serioze për kushtet në Bibby Stockholm, mënyrën e menaxhimit të azilkërkuesve, si dhe mungesën e protokolleve efektive për personat në gjendje të rënduar mendore.
Hetimi vijon.
