Ministri i Politikës Sociale, Demografisë dhe Rinisë në Maqedoninë e Veriut, Fatmir Limani, ka theksuar vendosmërinë e institucioneve të vendit për ta çrrënjosur dhunën ndaj grave dhe dhunën në familje, duke e cilësuar këtë si një nga sfidat më të mëdha të shoqërisë bashkëkohore.
Deklarata e ministrit Limani u bë në kuadër të mbajtjes së seancës konstituive të Trupit Koordinues Kombëtar për Zbatimin e Konventës së Këshillit të Evropës për Parandalimin dhe Luftimin e Dhunës ndaj Grave dhe Dhunës në Familje.
“Besoj se ky organ do të funksionojë si një mekanizëm i fuqishëm për mbrojtjen dhe avancimin e të drejtave të grave viktima të dhunës dhe dhunës në familje,” u shpreh ministri Limani, duke shtuar se qëllimi i përbashkët i institucioneve dhe shoqërisë është i qartë: tolerancë zero për dhunën ndaj grave dhe dhunën në familje.
Ai e pranoi se kjo dukuri vazhdon të jetë një plagë e thellë për shoqërinë, por theksoi se çrrënjosja e saj është e mundur vetëm me angazhimin e të gjithë faktorëve — institucionalë dhe shoqërorë.
“Si ministër, kam treguar ndjeshmëri të veçantë dhe vendosmëri për të vepruar,” tha Limani, duke nënvizuar se gjatë mandatit të tij janë ndërmarrë hapa konkretë dhe të rëndësishëm, përfshirë:
përmirësimin e legjislacionit kombëtar;
miratimin e Ligjit për Parandalimin dhe Mbrojtjen nga Dhuna;
përgatitjen e Strategjisë Kombëtare dhe Planeve të Veprimit;
forcimin e kapaciteteve të profesionistëve të përfshirë në këtë fushë;
si dhe zgjerimin e rrjetit të shërbimeve të specializuara për viktimat.
Ministri Limani siguroi se Qeveria e Republikës së Maqedonisë së Veriut dhe shoqëria civile do të intensifikojnë më tej të gjitha përpjekjet për eliminimin e çdo forme të dhunës, duke ndjekur politika të fuqishme dhe veprime konkrete për mbrojtje, mbështetje dhe siguri për të gjithë qytetarët.
“Bashkë krijojmë një shoqëri pa dhunë!” ishte mesazhi përmbyllës i ministrit Limani, që e bëri të qartë se lufta kundër dhunës nuk është thjesht prioritet politik, por një domosdoshmëri shoqërore dhe morale.
